ସମ୍ବଲପୁର, ୨୯/୬- ନିଛାଟିଆ ରିଙ୍ଗରୋଡ ବେନିୟମ ନିଶା କାରବାରୀ ଙ୍କ ପାଇଁ ଚରାଭୂଇଁ ସାଜିଛି, ଏପରି ଅଭିଯୋଗ ବାରମ୍ବାର ଜନସାଧାରଣଙ୍କ ପକ୍ଷରୁ ଅଣାଯାଉଛି । ପୁଲିସ ଏଦିଗରେ କଡ଼ା କାର୍ଯ୍ୟାନୁଷ୍ଠାନ ସହିତ ଜଣକୁ ସେଠାରେ ପ୍ରତିବନ୍ଧିତ କଫସିରପ ଥଣ୍ଡା ପାନୀୟ ଜଳ ସହିତ ମିଶାଇ ବିକ୍ରି କରୁଥିବା ସମୟରେ ରଙ୍ଗେ ହାତ ଧରିଛି । ଗତ ବିଳମ୍ବିତ ସନ୍ଧ୍ୟା ସମୟରେ ସ୍ଥାନୀୟ ମନ୍ଦଲିଆ ଅଞ୍ଚଳରେ ଏପରି ଜଣେ ଚୋରା କାରବାରୀ ଧରିବାରେ ପୁଲିସ ସଫଳ ହୋଇଛି । ସମ୍ପୃକ୍ତ କ୍ଷେତରାଜପୁର ଥାନାରେ ଏବିଷୟରେ ଏକ ମାମଲା ରୁଜୁ କରାଯାଇଛି । ପୁଲିସ ସୂତ୍ରରୁ ମିଳିଥିବା ସୂଚନା ଅନୁସାରେ ସେହି ଅଞ୍ଚଳରେ ପେଟ୍ରୋଲିଂ ସମୟରେ ସଠିକ ଖବରପାଇ ଜଣକୁ ଧରିଲା ପରେ ତାଠାରୁ ସିଲଯୁକ୍ତ ୫ବୋତଲ ପ୍ରତିବନ୍ଧିତ କଫସିରପ, ଏକ ବଡ଼ ବୋତଲରେ ପ୍ରାୟ ୧.୫ ଲିଟର ଅପମିଶ୍ରିତ କଫସିରପ, କିଛି ପ୍ରତିବନ୍ଧିତ ନିଶା ବଟିକା ଓ ଗ୍ରାହକ ଙ୍କୁ ଦେବାପାଇଁ କିଛି ପ୍ଲାଷ୍ଟିକ ଗିଲାସ ଜବତ ହୋଇଛି । ଉକ୍ତ ବ୍ୟକ୍ତି କୁ ସତ୍ୟମ ନାଗ (୩୦) ରୂପେ ଚିହ୍ନଟ କରାଯାଇଛି ଓ ସେ ନିକଟସ୍ଥ ତାଲଭଟାପଡା ନିବାସୀ ବୋଲି ଜଣାପଡିଛି ।
