ନୂଆଦିଲ୍ଲୀ : ଭାରତୀୟ ମହିଳା ଦିନିକିଆ ଏବଂ ଟେଷ୍ଟ ଦଳର ଅଧିନାୟକ ମିତାଲି ରାଜ ଗୋଟିଏ ଦିନରେ ଦୁଇଟି ବଡ଼ ରେକର୍ଡ କରିଛନ୍ତି । ଶନିବାର ଇଂଲଣ୍ଡ ବିପକ୍ଷ ତୃତୀୟ ଦିନିକିଆରେ ମହିଳା ଅନ୍ତର୍ଜାତୀୟ କ୍ରିକେଟରେ ମିତାଲି ସର୍ବାଧିକ ରନ୍ ସ୍କୋରର ହୋଇଥିଲେ । ଏହା ସହିତ ସେ ଦୁନିଆର ସର୍ବାଧିକ ଦିନିକିଆ ମ୍ୟାଚ୍ ଜିତିଥିବା ମହିଳା ଅଧିନାୟକ ହୋଇଛନ୍ତି । ପୁରୁଷ କ୍ରିକେଟରେ ସଚିନ ତେନ୍ଦୁଲକର ଯେପରି ସର୍ବାଧିକ ରନ୍ ସ୍କୋରର ରହିଛନ୍ତି । ସେହିପରି ମିତାଲ ମହିଳା କ୍ରିକେଟରେ ଏହି କୃତୀତ୍ୱ ହାସଲ କରିଛନ୍ତି ।
ତୃତୀୟ ଦିନିକିଆରେ ମିତାଲି ୭୫ ରନର ଅପରାଜିତ ଇନିଂସ ଖେଳିଥିଲେ । ବର୍ତ୍ତମାନ ଆନ୍ତର୍ଜାତୀୟ କ୍ରିକେଟ୍ ରେ ସେ ୩୧୭ ମ୍ୟାଚ୍ ରେ ୧୦,୩୩୭ ରନ୍ କରିଛନ୍ତି । ସେ ଇଂଲଣ୍ଡର ପୂର୍ବତନ ଅଧିନାୟକ ଚାର୍ଲେଟ ଏଡୱାର୍ଡସଙ୍କୁ (୩୦୯ ଟି ମ୍ୟାଚରେ ୧୦,୨୭୩ ରନ୍) ଅତିକ୍ରମ କରିଥିଲେ । ତୃତୀୟ ଦିନିକିଆ ପୂର୍ବରୁ ମିତାଲି ଇଂଲଣ୍ଡର ପୂର୍ବତନ ଅଧିନାୟକଙ୍କଠାରୁ ୧୧ ରନରେ ପଛରେ ରହିଥିଲେ । ସେ ନାଟ୍ ଶେଭରଙ୍କ ବଲରେ ଏକ ଚୌକା ମାରି ଏହି ମାଇଲଖୁଣ୍ଟ ହାସଲ କରିଥିଲେ । ଏହିପରି, ବର୍ତ୍ତମାନ ଉଭୟ ପୁରୁଷ ଏବଂ ମହିଳା ଅନ୍ତର୍ଜାତୀୟ କ୍ରିକେଟ୍ ର ଶୀର୍ଷ ରନ୍ ସ୍କୋରର ଭାରତୀୟ ହୋଇପାରିଛନ୍ତି । ପୁରୁଷ କ୍ରିକେଟ୍ ରେ ୩୪,୩୫୭ ରନ୍ ସହ ସଚିନ୍ ତେନ୍ଦୁଲକର ପ୍ରଥମ ସ୍ଥାନରେ ଅଛନ୍ତି ।
ତୃତୀୟ ଦିନିକିଆରେ ମିତାଲିଙ୍କ ଇନିଂସ ଭାରତକୁ ୪ ୱିକେଟ୍ ଜିତିବାରେ ସାହାଯ୍ୟ କରିଥିଲା । ପ୍ରଥମେ ବ୍ୟାଟିଂ କରି ଇଂଲଣ୍ଡ ୨୧୯ ରନ୍ ସଂଗ୍ରହ କରିଥିଲା । ଏହାର ଜବାବରେ ଭାରତ ୪୬.୩ ଓଭରରେ ୬ ୱିକେଟ୍ ନେଇ ୨୨୦ ସ୍କୋର କରି ମ୍ୟାଚ୍ ଜିତିଥିଲା । ଏହା ସହ ମିତାଲି ବର୍ତ୍ତମାନ ଦିନିକିଆ କ୍ରିକେଟ୍ରେ ବିଶ୍ୱର ସର୍ବାଧିକ ମ୍ୟାଚ୍ ବିଜେତା ଅଧିନାୟକ ହୋଇପାରିଛନ୍ତି । ତାଙ୍କ ଅଧିନାୟକତ୍ୱରେ ଏହା ଭାରତୀୟ ମହିଳା ଦଳର ୮୪ ତମ ବିଜୟ ଥିଲା । ସେ ଅଷ୍ଟ୍ରେଲିଆର ବେଲିଣ୍ଡା କ୍ଲାର୍କ (୮୩ ବିଜୟ) ଙ୍କ ରେକର୍ଡକୁ ଭାଙ୍ଗିଛନ୍ତି ।
