ସମ୍ବଲପୁର, ୭/୭ – ସ୍ଥାନୀୟ ଅଇଁଠାପାଲି ସ୍ଥିତ ଏକ ପେଟ୍ରୋଲ ପମ୍ପରେ ଡକାୟତି ପାଇଁ ଯୋଜନା କରୁଥିବା ବେଳେ ପୁଲିସ ଚଢ଼ାଉ ଫଳରେ ଏହା ପଣ୍ଡ ହୋଇଛି । ଏବିଷୟରେ ପୁଲିସ ସୂତ୍ରରୁ ପ୍ରାପ୍ତ ସୂଚନା ଅନୁସାରେ ଗତ ରାତି ପ୍ରାୟ ୨ଟା ବେଳେ ସ୍ଥାନୀୟ ସିଂପାଲି ଗାଁ ପଡିଆରେ କିଛି ଯୁବକଙ୍କୁ ସନ୍ଦିଗ୍ଧ ଅବସ୍ଥାରେ ଦେଖି ପୁଲିସ ଦଳ ସେମାନଙ୍କ ପାଖକୁ ଯିବାରୁ ସେମାନେ ସେଠାରୁ ଧାଇଁ ପଳାଇବାକୁ ଚେଷ୍ଟା କରିଥିଲେ । ସେମାନଙ୍କ ମଧ୍ୟରୁ ଦୁଇ ଜଣଙ୍କୁ ଧରିବାରେ ପୁଲିସଦଳ ସଫଳ ହେଲେ ଓ ତିନି ଜଣ ଫେରାର ହୋଇଯାଇଥିଲେ । ପୁଲିସ ସେମାନଙ୍କ ଠାରୁ ଏକ ବନ୍ଧୁକ, ଛୁରୀକଟୁରୀ, ଲୁହା ଛଡ଼, ଟର୍ଚ୍ଚଲାଇଟ, ମହମବତୀ, ମାଚିସ ଓ ଲଙ୍କାଗୁଣ୍ଡ ଆଦି ଜବତ କରିଛି । ଧରା ପଡ଼ିଥିବା ଦୁହିଁଙ୍କ ଚିହ୍ନଟ କରାଯାଇଛି । ସେମାନେ ହେଲେ ସରଭ ବେହେରା ଓ ଆଦିତ୍ୟ ମହାନ୍ତି । ସେମାନଙ୍କୁ ପୋଲିସ ପଚରାଉଚରା ସମୟରେ ସେମାନେ ସ୍ୱୀକାର କରିଛନ୍ତି ଯେ ପାଖ ଅଇଁଠାପାଲି ଛକ ସ୍ଥିତ ଏକ ପେଟ୍ରୋଲ ପମ୍ପରେ ଡକାୟତି ପାଇଁ ସେମାନେ ଯୋଜନା କରୁଥିଲେ । ଫେରାର ତିନିଜଣଙ୍କୁ ଧରିବାପାଇଁ ମଧ୍ୟ ପୋଲିସ ଚେଷ୍ଟା ଜାରିରଖିଛି ।
