ପାଟଣାଗଡ଼,୨୭/୭ : ବଲାଙ୍ଗିର ଜିଲ୍ଲା ଖପ୍ରାଖୋଲ ବ୍ଲକ ଐତିହାସିକ ପର୍ଯ୍ୟଟନସ୍ଥଳ ହରିଶଙ୍କର ଠାରେ କଂଟାବାଞ୍ଜି ପ୍ରେସ କ୍ଲବର ବନ୍ଧୁ ମିଳନ କାର୍ଯ୍ୟକ୍ରମ ଏବଂ କାର୍ଗିଲ ବିଜୟ ଦିବସ ପାଳିତ ହୋଇଯାଇଛି । ପ୍ରେସ କ୍ଲବ ସଭାପତି ପ୍ରଭଜିତ ସିଂ ସାଲୁଜାଙ୍କ ଅଧ୍ୟକ୍ଷତାରେ ଏକ ବୈଠକ ଅନୁଷ୍ଠିତ ହୋଇଥିଲା । ପ୍ରେସ କ୍ଲବ ଗତ ୧ ବର୍ଷ ଭିତରେ ଯେଉଁସବୁ ଜନମଙ୍ଗଳ କାମ କରିଛି ସେ ଉପରେ ଆଲୋଚନା କରାଯାଇଥିଲା । ସଂଗଠନ ଆରମ୍ଭ ହେବା ଦିନ ଠାରୁ ଆଜିଯାଏ ଦୁଇ ଦୁଇ ଥର ରକ୍ତଦାନ ଶିବିର ଆୟୋଜନ କରି ପ୍ରାୟ ୨୫୦ ରୁ ଅଧିକ ୟୁନିଟ ରକ୍ତ ସଂଗ୍ରହ, ନିଃଶୁଳ୍କ ଚକ୍ଷୁ ଚିକିତ୍ସା ଶିବିର, ପ୍ରଶାସନର ସହଯୋଗରେ କୋଭିଡ ଟିକାକରଣ କାର୍ଯ୍ୟକ୍ରମ, ଅସହାୟ ମାନଙ୍କୁ କୋଭିଡ ସମୟରେ ମାକ୍ସ, ରନ୍ଧାଖାଦ୍ୟ ବଣ୍ଟନ କୋଭିଡ ରୋଗୀଙ୍କୁ ଅକ୍ସିଜେନ ସେବା, ପ୍ରଶାସନକୁ ନିଜ ତରଫରୁ ଅକ୍ସିଜେନ ପ୍ରଦାନ କରିବା ଭଳିି ଅନେକ ସମାଜସେବା କାମ କରିଛନ୍ତି । କୋଭିଡର ଦ୍ୱିତୀୟ ଲହରୀ ସମୟରେ ବଲାଙ୍ଗିର ପ୍ରଶାସନକୁ ଅକ୍ସିଜେନ ସେବାରେ ସହଯୋଗ କରିଥିବାରୁ ଜିଲ୍ଲାପାଳ ଚଞ୍ଚଳ ରଣା କଂଟାବାଞ୍ଜି ତହସିଲଦାର ଅଶୋକ କୁମାର ମାଝୀଙ୍କ ଜରିଆରେ କିଛିଦିନ ତଳେ ପ୍ରଶଂସାପତ୍ର ଦେଇ ପ୍ରେସକ୍ଲବର ଏଭଳି କାମପାଇଁ ଧନ୍ୟବାଦ ଜଣାଇଥିଲେ । ତେବେ ବନ୍ଧୁ ମିଳନ ଅବସରରେ ହୋଇଥିବା ବୈଠକରେ ଆଗକୁ ମଧ୍ୟ ପ୍ରେସକ୍ଲବ ଏଭଳି ଜନମଙ୍ଗଳ କାମ ଜାରିରଖିବ ବୋଲି ସଦସ୍ୟମାନେ ଶପଥ ନେଇଥିଲେ । ଏହାସହ ଖପ୍ରାଖୋଲ ରେଞ୍ଜର ଶ୍ରୀବତ୍ସ କୁମୁରାଙ୍କ ସହଯୋଗ ଏବଂ ଫରେଷ୍ଟର ପ୍ରିୟବ୍ରତ ମହାକୁଡଙ୍କ ଉପସ୍ଥିତିରେ ବୃକ୍ଷରୋପଣ କରାଯାଇଥିଲା । ଏହି କାର୍ଯ୍ୟକ୍ରମରେ ପ୍ରେସକ୍ଲବ କାର୍ଯ୍ୟକାରୀ ସଭାପତି ସୁରଦାସ ବାଗ, ସଂପାଦକ ପୁଷ୍ପକେତୁ ବେହେରା, ଉପସଭାପତି ରଶ୍ମିରଂଜନ ପୁଟେଲ, ପରାମର୍ଶଦାତା ଆନନ୍ଦ ମୋଟେ, ଆଶିଷ ଖଇତାନ, ଦୁର୍ଗାପ୍ରସାଦ ଗୁପ୍ତା, କାର୍ଯ୍ୟକାରୀ ସଦସ୍ୟ ସୁବ୍ରତ ମହାକୁଡ଼, ରୋହନ ମହତ, ବିଶିକେଶନ ମାଝୀଙ୍କ ସହ ଅନ୍ୟମାନେ ଉପସ୍ଥିତ ଥିଲେ ।
