ଖୋର୍ଦ୍ଧା,୧/୮: ଖୋର୍ଦ୍ଧା ଆଦର୍ଶ ଥାନା ଅନ୍ତର୍ଗତ ଗୁରୁଜଙ୍ଗ ଦୋଳମଣ୍ଡପ ମେଳନ ପଡିଆରେ ଗତକାଲି ପୁଲିସ ଚଢାଉ କରି ବ୍ରାଉନ ସୁଗାର ଜବତ କରିବା ସହିତ ଜଣକୁ ଗିରଫ କରିଛି । ଗିରଫ ଜଣକ ସ୍ଥାନୀୟ ଦେବାନ ସାହିର ସର୍ବେଶ୍ୱର ବେହେରା ଓରଫ ବାପି(୨୯) । ଅଭିଯୁକ୍ତ ବାପି ସେହି ଅଞ୍ଚଳରେ ବହୁଦିନ ହେବ ବ୍ରାଉନ ସୁଗାର ବେପାର କରିଆସୁଥିଲେ । ଦୋଳମଣ୍ଡପ ମେଳନ ପଡିଆରେ ବସି ବେପାର କରୁଥିବା ସମୟରେ ଖବରପାଇ ଆଦର୍ଶ ଥାନା ପୁଲିସ ଅଚାନକ ଚଢାଉ କରି ଅଭିଯୁକ୍ତ ବାପି ଧରିଥିଲା । ଏଥିସହିତ ତା ନିକଟରୁ ୩୦.୮ ଗ୍ରାମର ବ୍ରାଉନ ସୁଗାର ଜବତ କରିଥିଲା । ଜବତ ବ୍ରାଉନ ସୁଗାରର ଆନୁମାନିକ ମୁଲ୍ୟ ପ୍ରାୟ ୩ଲକ୍ଷ ଟଙ୍କା ହେବ ବୋଲି ଥାନା ଅଧିକାରୀ ସଞ୍ଜୟ ପଟ୍ଟନାୟକ ସୁଚନା ଦେଇଛନ୍ତି । ବାରମ୍ବାର ଗୁରୁଜଙ୍ଗରେ ବ୍ରାଉନ ସୁଗାର ବେପାରୀଙ୍କୁ ଧରାହେଲେ ମଧ୍ୟ ସେଠାରେ ବ୍ରାଉନ ସୁଗାର ବେପାରୀ ସକ୍ରିୟ ରହୁଥିବାରୁ ସେଠାକାର ଯୁବଗୋଷ୍ଠି ଉପରେ ଏହାର କୁପ୍ରଭାବ ପଡିବାକୁ ନେଇ ସାଧାରଣରେ ଚର୍ଚ୍ଚା ହେଉଥିବା ଦେଖିବାକୁ ମିଳିଛି ।
