ନୂଆଦିଲ୍ଲୀ: ବଦଳିଲା ଖେଳରତ୍ନ ପୁରସ୍କାରର ନାମ । ଏନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସୂଚନା ଦେଇଛନ୍ତି । ରାଜୀବ ଗାନ୍ଧୀ ଖେଳରତ୍ନ ବଦଳରେ ଧ୍ୟାନଚାନ୍ଦ ଖେଳରତ୍ନ ପୁରସ୍କାରଭାବେ ପରିବର୍ତ୍ତନ କରାଯାଇଛି । ଭାରତରେ ଖେଳ ପାଇଁ ଦିଆଯାଉଥିବା ଖେଳରତ୍ନ ପୁରସ୍କାର ଏବେ ହକି ଯାଦୁଗର କୁହାଯାଉଥିବା ମେଜର ଧ୍ୟାନଚାନ୍ଦ ନାମରେ ନାମିତ କରାଯାଇଛି । ଏନେଇ ମୋଦୀ ଟ୍ୱିଟ ଯୋଗେ ସୂଚନା ଦେଇଛନ୍ତି ।ସେ କହିଛନ୍ତି ଯେ, ଧ୍ୟାନଚାନ୍ଦଙ୍କ ନାମରେ ଖେଳରତ୍ନ ପୁରସ୍କାର ନାମିତ କରିବା ପାଇଁ ସାରା ଦେଶରୁ ପ୍ରସ୍ତାବ ଆସୁଥିଲା । ଲୋକଙ୍କ ଭାବାବେଗକୁ ସମ୍ମାନ ଜଣାଇ ରାଜୀବ ଗାନ୍ଧୀ ଖେଳରତ୍ନକୁ ଧ୍ୟାନଚାନ୍ଦ ଖେଳରତ୍ନ ପୁରସ୍କାରଭାବେ ପରିବର୍ତ୍ତନ କରାଯାଇଛି ବୋଲି ମୋଦୀ କହିଛନ୍ତି । ଭାରତୀୟ କ୍ରୀଡାରେ ଧ୍ୟାନଚାନ୍ଦ ଏକ ବେଶ ପରିଚିତ ନାମ । ସେ ତାଙ୍କ ୨୦ ବର୍ଷର ହକି ଜୀବନ ମଧ୍ୟରେ ୧ ହଜାରରୁ ଅଧିକ ଗୋଲ କରିଛନ୍ତି । ଏହାସହ ତାଙ୍କୁ ଭାରତୀୟ ହକିରେ ମହାନାୟକ ବୋଲି ଗଣନା କରାଯାଏ । ସେ ଅଲିମ୍ପିକ୍ସରେ ଭାରତକୁ ୩ ଥର ସ୍ୱର୍ଣ୍ଣ ପଦକ ବିଜୟୀ କରାଇଥିଲେ ।
