ପୁରୀ: ଶ୍ରୀମନ୍ଦିର ପ୍ରଶାସନର ଏସ୍ଓପି ଅନୁଯାୟୀ ଆଜି ଶ୍ରୀମନ୍ଦିରକୁ ସାନିଟାଇଜ କରାଯାଇଛି । ସକାଳୁ ଅଗ୍ନିଶମ କର୍ମଚାରୀମାନେ ଆସି ଶ୍ରୀମନ୍ଦିର ଭିତରେ ଓ ବାହାରକୁ ସାନିଟାଇଜ କରିଛନ୍ତି । ଶ୍ରୀମନ୍ଦିର ପ୍ରଶାସନର ଏସ୍ଓପି ଅନୁଯାୟୀ ପ୍ରତେକ ସପ୍ତାହ ର ଶନିବାର ଓ ରବିବାର ଶ୍ରୀମନ୍ଦିରରେ ସାଧାରଣ ଦର୍ଶନ ବନ୍ଦ ରହିବ । ଏହି ଦୁଇଦିନ ଶ୍ରୀମନ୍ଦିରକୁ ସାନିଟାଇଜ କରାଯିବ । ସେହିପରି ସୋମବାର ଜନ୍ମାଷ୍ଟମୀ ଥିବାରୁ ଭକ୍ତଙ୍କ ଗହଳି ଆଶଙ୍କାକୁ ଦୃଷ୍ଟିରେ ରଖାଯାଇ ସୋମବାର ଶ୍ରୀମନ୍ଦିର ଭକ୍ତଙ୍କ ପାଇଁ ବନ୍ଦ ରହିବ । ମଙ୍ଗଳବାର ପୁଣି କୋଭିଡ ଗାଇଡ଼ ଲାଇନ ଓ ଏସ୍ଓପି ଅନୁଯାୟୀ ସାଧାରଣ ଦର୍ଶନ ଆରମ୍ଭ ହେବ । କୋଭିଡ ଡବଲ ଡୋଜ ଟୀକା ସାର୍ଟିଫିକେଟ ଅବା ୯୬ ଘଣ୍ଟାର କୋଭିଡ ଆର୍ଟିପିସିଆର ନେଗେଟିଭ ରିପୋର୍ଟ ଭକ୍ତ ମାନେ ଦେଖାଇ ଶ୍ରୀମନ୍ଦିରରେ ମହାପ୍ରଭୁଙ୍କୁ ଦର୍ଶନ କରିପାରିବେ । ଶୃଙ୍ଖଳିତ ଦର୍ଶନ ପାଇଁ ପ୍ରଶାସନ ପକ୍ଷରୁ ସମସ୍ତ ବ୍ୟବସ୍ଥା ହୋଇଥିବା ବେଳେ ଭକ୍ତମାନେ ସକାଳ ୭ ଟା ରୁ ସନ୍ଧ୍ୟା ୭ ଟା ଯାଏ ଦର୍ଶନ କରିବା ସମୟ ରହିଛି ।
