ସୋନପୁର,୧୭/୯- ଭରା ନଇରେ ଭାସୁଥିବା ଏକ ଯୁବକଙ୍କୁ ଆଜି ପବ୍ଲିକରୁ ସୂଚନାପାଇ ସୋନପୁର ଅଗ୍ନିଶମ ବିଭାଗ କର୍ମଚାରୀ ଦୀର୍ଘ ଚାରି ଘଣ୍ଟା ର ଅପରେସନ ପରେ ଉଦ୍ଧାରକରି ମେଡିକାଲକୁ ଚିକିତ୍ସା ପାଇଁ ପହଞ୍ଚାଇ ସ୍ଥାନୀୟ ପୋଲିସକୁ ହସ୍ତାନ୍ତର କରିଥିବାଜଣାପଡିଛି । ଖବରପାଇ ସୋନପୁର ଦମକଳବାହିନୀ ଅଧିକାରୀ ବଳରାମ ପଧାନଙ୍କ ନେତୃତ୍ୱରେ ଓ କନେଷ୍ଟବଳ ଦିଲୀପ ଦେହୁରୀଙ୍କ କୌଶଳକ୍ରମେ ସମସ୍ତ କର୍ମଚାରୀଙ୍କ ସହାୟତାରେ ଦୀର୍ଘ ୪ ଘଣ୍ଟା ର ଅପରେସନ ପରେ ଖୁବକଷ୍ଟରେ ଉକ୍ତ ଯୁବକଙ୍କୁ ଉଦ୍ଧାର କରି ନୌକାରେ ତେନ୍ତୁଳି ଘାଟ ମହାନଦୀ କୂଳକୁ ଆଣିଥିଲେ । ମହାନଦୀ ସେତୁ ଉପରେ ଗୋଟିଏ ଏଟିଏମ, ମୋବଇଲ, ଚପଲ ଓ ସାଇକେଲ ରଖାଯାଇଥିବାରୁ ଯୁବକଟି କିଛି ଘରୋଇ କଳିରୁ ଆତ୍ମହତ୍ୟା ପାଇଁ ଭରା ନଈକୁ ଲମ୍ଫ ଦେଇଥିବା ଅନୁମାନ କରାଯାଉଛି । ଏବେ ସୁଦ୍ଧା ଯାହା ରିପୋର୍ଟ ମିଳିଛି ପୋଲିସ ଉକ୍ତ ଯୁବକଙ୍କୁ ଥାନାରେ ରଖି ଅଧିକ ପଚରା ଉଚୁରା କରୁଛି । ଯୁବକଙ୍କ ନାଁ ସାରଥୀ ତାଣ୍ଡି ବୋଲି ଜଣାପଡିଛି ।
