ବାଲିଗୁଡ଼ା: ଖାକି ପୋଷାକ ତଳେ ଲୁଚି ରହିଛି କଳାକାରଟିଏ । ପୋଲିସ୍ ନାଁ ଶୁଣିଲେ ଲୋକେ ଭୟ କରନ୍ତି । ହେଲେ ସେଇ ଭୟର ପୋଷାକ ତଳେ ମଧ୍ୟ ନରମ ହୁଦୟଟିଏ ମଧ୍ୟ ଥାଇପାରେ ଏହା ପ୍ରମାଣିତ କରିଛନ୍ତି ବାଲିଗୁଡ଼ା ଏସଡିପିଓ ମାନସ ରଞ୍ଜନ ବାରିକ୍ ଓ ଆଇଆଇସି ପ୍ରଶାନ୍ତ କୁମାର ବେହେରା । ଦ୍ବିତୀୟ ଥର ପାଇଁ ବାଲିଗୁଡ଼ା ପୋଲିସ୍ ପକ୍ଷରୁ ଆଉ ଏକ ସଚେତନତା ଗୀତ ରିଲିଜ୍ ହୋଇଛି ।
ସାରାଦେଶରେ କରୋନା କାୟା ମେଲେଇ ଚାଲିଛି । ଏପଟେ ରାଜ୍ୟରେ ଦିନକୁଦିନ ସଂକ୍ରମିତଙ୍କ ସଙ୍ଖ୍ୟା ବଢ଼ିବାରେ ଲାଗିଛି । ବର୍ତ୍ତମାନ ସୁଦ୍ଧା ରାଜ୍ୟରେ ସଂକ୍ରମିତଙ୍କ ସଙ୍ଖ୍ୟା ୧୫୯ରେ ପହଁଚିଲାଲାଣି । ରାଜ୍ୟରେ ଏବେ ପ୍ରବାସୀ ଓଡ଼ିଆଙ୍କ ଘର ବାହୁଡ଼ା ମଧ ଚାଲିଛି । ଲକ୍ ଡାଉନ୍ କୁ ନେଇ ପୋଲିସ୍ ଓ ପ୍ରଶାସନ ପକ୍ଷରୁ କଟକଣା ମଧ୍ୟ ରହିଛି । ଏଭଳି ପରିସ୍ଥିତିରେ ଲୋକେ ଘରୁ ବାହାରକୁ ବାହାରିଲେ ପୋଲିସ୍ କୁ ଭୟ କରୁଛନ୍ତି କିନ୍ତୁ ପୋଲିସ ଜନସାଧାରଣଙ୍କୁ ଆଉ ଟିକିଏ ସଚେତନ କରାଇବା ପାଇଁ ଭିନ୍ନ ପ୍ରୟାସ ଜାରି ରଖିଛି । ଜନସାଧାରଣଙ୍କ ଉଦ୍ଦେଶ୍ୟରେ ବାଲିଗୁଡ଼ା ପୋଲିସ୍ ପକ୍ଷରୁ ଆଉଏକ ସଚେତନତା ଗୀତ ଛୋଟ ଏକ ଭୁଲ୍ ସାରିଦେବ… ଉନ୍ମୋଚିତ ହୋଇଛି । ବାଲିଗୁଡ଼ା ଥାନା ପରିସରରେ ଏସଡିପିଓ ମାନସ ରଞ୍ଜନ ବାରିକ୍, ଆଇଆଇସି ପ୍ରଶାନ୍ତ କୁମାର ବେହେରା, ବିଡ଼ିଓ ନରେଶ ଚନ୍ଦ୍ର ସବର, ତହସିଲଦାର ସୁଶ୍ରୀ ଖିରାବ୍ଧୀତନୟା ସାହୁ, ଡାକ୍ତର ଗୋକୁଳ ଚାନ୍ଦ, ଏନ୍ଏସି କାର୍ଯ୍ୟନିର୍ବାହୀ ଅଧିକାରୀ ଜୟଦେବ ଷଢଙ୍ଗି, ଅଧ୍ୟକ୍ଷ ଲୋକନାଥ ପାଢ଼ୀ ପ୍ରମୁଖ ଉପସ୍ଥିତ ରହି ଗିତର ସିଡି ଉନ୍ମୋଚିତ କରିଛନ୍ତି । ଏହି ଗିତରେ ସମସ୍ତ କରୋନା ଯୋଦ୍ଧାଙ୍କ କାର୍ଯ୍ୟ ଶୈଳୀକୁ ବର୍ଣ୍ଣିତ କରିବାସହ ଜନସାଧାରଣଙ୍କ ପାଇଁ ସଚେତନର ବାର୍ତ୍ତା ରହିଛି । ଏସଡିପିଓ ମାନସ ରଞ୍ଜନ ବାରିକ୍ ଗିତ ରଚନା କରିଥିବାବେଳେ ବାଲିଗୁଡ଼ା ଥାନା ଆଇଆଇସି ପ୍ରଶାନ୍ତ କୁମାର ବେହେରା ଓ ବାଲିଗୁଡ଼ା ଉପଖଣ୍ଡ ଚିକିତ୍ସାଳୟରେ କାର୍ଯ୍ୟରତ ଯୁବ ଡାକ୍ତର ଡ. ଗୋକୁଳ ଚାନ୍ଦ କଣ୍ଠଦାନ କରିଛନ୍ତି । ପୋଲିସ୍ ର ଏଭଳି ପ୍ରୟାସ କୁ ଅଞ୍ଚଳବାସୀ ପ୍ରଶଂସା କରିଛନ୍ତି ।
