ଭୁବନେଶ୍ୱର : ଅଦୃଶ୍ୟ ଶକ୍ତି ସହିତ ଲଢୁଥିବା ଦେଶର ଅଗଣିତ ସ୍ୱାସ୍ଥ୍ୟକର୍ମୀ ତଥା ଡାକ୍ତର, ସେବିକା, ନର୍ସ, ଆଶାକର୍ମୀଙ୍କ ଉଦ୍ଦେଶ୍ୟରେ ଭାରତୀୟ ସେନା ପକ୍ଷରୁ ଆଜି ସମ୍ମାନ ପ୍ରଦର୍ଶନ କରାଯାଇଛି । ତିନି ସେନାର ମୁଖ୍ୟ ଦେଶବ୍ୟାପୀ କରୋନା ଯୋଦ୍ଧା ତଥା କରୋନା ୱାଇରମାନଙ୍କୁ ସମ୍ମାନ ପ୍ରଦର୍ଶନ କରି ସେମାନଙ୍କୁ ଶ୍ରେଷ୍ଠ ଯୋଦ୍ଧା ଭାବରେ ପୁଷ୍ପବୃଷ୍ଟି କରିଛନ୍ତି । ଏହି କ୍ରମରେ ଆମ ରାଜ୍ୟର ସମ୍ମୁଖ ଯୋଦ୍ଧା ଡାକ୍ତର, ସ୍ୱାସ୍ଥ୍ୟକର୍ମୀମାନଙ୍କୁ ହେଲିକେପ୍ଟରରୁ ପୁଷ୍ପ ବୃଷ୍ଟି କରାଯାଇ ସମ୍ମାନ ଦିଆଯାଇଥିଲା ।
ଏହି ଉପଲକ୍ଷେ ଭୁବନେଶ୍ୱର ସ୍ଥିତ କିମ୍ସ କୋଭିଡ ହସ୍ପିଟାଲ ପ୍ରାଙ୍ଗଣରେ ବ୍ୟାପକ ଆୟୋଜନ କରାଯାଇଥିଲା । ସାମାଜିକ ଦୂରତା ରକ୍ଷା କରି ସମ୍ମୁଖ ଯୋଦ୍ଧାମାନେ ଏକତ୍ରିତ ହୋଇ ଏହି ସମ୍ମାନ ଗ୍ରହଣ କରିଥିଲେ । ଏହାବ୍ୟତୀତ ଦିଲ୍ଲୀର ଜାତୀୟ ପୁଲିସ ସ୍ମାରକୀରେ ସେନା ପକ୍ଷରୁ ମଧ୍ୟ ପୁଷ୍ପବୃଷ୍ଟି କରାଯାଇଥିଲା । ସେହିଭଳି ନୌସେନା ପକ୍ଷରୁ ମଧ୍ୟ ଏହି ସମ୍ମାନ ପ୍ରଦର୍ଶନ କରାଯାଇଥିଲା ।
