ସମ୍ବଲପୁର: ସ୍ଥାନୀୟ ସଦରଥାନା ଅନ୍ତର୍ଗତ କଣ୍ଡେଇପାଲି ଗାଁ ନିକଟସ୍ଥ ଗାଈଖାଇ ପୋଲ ଉପରେ ଏକ ଟ୍ରଲର ଧକ୍କାରେ ଜଣେ ପୁଲିସ ସିପାହୀ ପ୍ରାଣ ହରାଇଛନ୍ତି । ଗତକାଲି ଅପରାହ୍ନରେ ଏହି ଦୁର୍ଘଟଣା ଘଟିଛି । ମୃତ ସିପାହୀ ଜଣକ ରୋହିତ ଭୋସାଗର (୫୬) ସ୍ଥାନୀୟ ଗୁରୁପାଲି ନିବାସୀ ବୋଲି ଜଣାପଡିଛି । ସେ କ୍ଷେତରାଜପୁର ଥାନାରେ ପଦସ୍ଥ ଥିଲେ ଓ ସେଠାରୁ ନିଜ ଗାଁକୁ ବାଇକରେ ଫେରିବା ସମୟରେ ଏପରି ଦୁର୍ଘଟଣାର ଶିକାର ହୋଇଥିଲେ । ଖବରପାଇ ସଦର ଥାନାର ଏକ ପିସିଆର ଭ୍ୟାନ ଯୋଗେ ତାଙ୍କୁ ଆହତାବସ୍ଥାରେ ଅଇଁଠାପାଲି ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରକୁ ନିଆଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଦୁର୍ଘଟଣା ଘଟାଇଥିବା ଟ୍ରଲର, ସିଜି ୦୪ ଜେସି ୧୩୮୧ ଘଟଣାସ୍ଥଳରୁ ଫେରାର ହେବା ପାଇଁ ଚେଷ୍ଟା କରିଥିଲା । ପୁଲିସଦଳ ପିସିଆର ଭ୍ୟାନ ଯୋଗେ ଗୋଡାଇ କାବୁ କରିଥିଲେ । ଏନେଇ ଏକ ମାମଲା ରୁଜୁ କରାଯାଇଛି ।
