ସୁରତ : ଆଇପିଏଲ୍ ୨୦୨୨ ଆରମ୍ଭ ହେବାକୁ ଆଉ କିଛି ଦିନ ବାକି ଥିବାବେଳେ ସମସ୍ତ ଦଳ ପ୍ରସ୍ତୁତି ଆରମ୍ଭ କରିଦେଇଥିବା ବେଳେ ଡିଫେଣ୍ଡିଂ ଚାମ୍ପିଅନ୍ ଚେନ୍ନାଇ ସୁପର କିଙ୍ଗ୍ସ ନିଜର ତାରକା ଖେଳାଳିଙ୍କ ଆହତ ସମସ୍ୟା ଯୋଗୁଁ ଚିନ୍ତାରେ ରହିଛି । ୧୪ କୋଟି ଟଙ୍କା ଖର୍ଚ୍ଚ କରିବା ପରେ ସିଏସକେ ଦୀପକ ଚହରଙ୍କୁ ସେମାନଙ୍କ ଦଳରେ ସାମିଲ କରିଛି, କିନ୍ତୁ ଏହି ଖେଳାଳି ଲିଗ୍ ଆରମ୍ଭ ପୂର୍ବରୁ ଆହତ ହୋଇଥିଲେ । ବର୍ତ୍ତମାନ ସିଏକେ ପାଇଁ ଏକ ଖୁସି ଖବର ହେଉଛି ଏପ୍ରିଲ୍ ମଧ୍ୟଭାଗରେ ଦୀପକ ଚହର ଚୟନ ପାଇଁ ଉପଲବ୍ଧ ହୋଇପାରନ୍ତି ।
ଟାଇମ୍ସ ଅଫ୍ ଇଣ୍ଡିଆ ଖବର ଅନୁଯାୟୀ ଦୀପକ ଚହର ଅସ୍ତ୍ରୋପଚାର କରିବାକୁ ମନା କରି ଦେଇଛନ୍ତି, ସେ ବର୍ତ୍ତମାନ ୮ ସପ୍ତାହ ପାଇଁ ଏନସିଏରେ ଅଛନ୍ତି । ଏପ୍ରିଲ ମଧ୍ୟଭାଗରେ ସେ ଦଳରେ ଯୋଗ ଦେଇ ପାରିବେ ବୋଲି ଆଶା କରାଯାଉଛି ।
ଚେନ୍ନାଇ ସୁପର କିଙ୍ଗ୍ସକୁ ୨୬ ମାର୍ଚ୍ଚରେ କୋଲକାତା ନାଇଟ୍ ରାଇଡର୍ସ ବିପକ୍ଷରେ ଆଇପିଏଲ୍ ୨୦୨୨ ର ପ୍ରଥମ ମ୍ୟାଚ୍ ଖେଳିବାକୁ ପଡିବ । ଦଳ ଏଥିପାଇଁ ସୁରତରେ ପ୍ରସ୍ତୁତି ଆରମ୍ଭ କରିଛି । ସିଏସକେ ଚାହୁଁଛି ଦୀପକ ଚହର ଲିଗ୍ ପୂର୍ବରୁ ସେମାନଙ୍କ ସହ ଯୋଗଦାନ କରନ୍ତୁ ଯାହା ଦ୍ୱାରା ସେମାନେ ତାଙ୍କର ଫିଟନେସ ଉପରେ କାର୍ଯ୍ୟ କରିପାରିବେ ଏବଂ ତାଙ୍କୁ ଶୀଘ୍ର ଚୟନ ପାଇଁ ଉପଲବ୍ଧ କରାଇ ପାରିବେ ।
ପ୍ରାଥମିକ ଅନୁସନ୍ଧାନ ପରେ, ଦୀପକ ଚହରଙ୍କୁ ଅସ୍ତ୍ରୋପଚାର ପାଇଁ ପରାମର୍ଶ ଦିଆଯାଇଥିଲା, କିନ୍ତୁ ଆଗାମୀ ଟି -୨୦ ବିଶ୍ୱକପକୁ ଦୃଷ୍ଟିରେ ରଖି ଏହି ଖେଳାଳି ଅସ୍ତ୍ରୋପଚାର କରିବାକୁ ମନା କରି ଦେଇଛନ୍ତି । ଯଦି ଚହର ଅସ୍ତ୍ରୋପଚାର କରିଥାନ୍ତେ, ତେବେ ସେ ଦୀର୍ଘ ସମୟ ଧରି ଦଳରୁ ବାହାରେ ରହିବାକୁ ପଡିଥାନ୍ତା ଏବଂ ଟି -୨୦ ବିଶ୍ୱକପରେ ଖେଳିବାର ଆଶା ହରାଇଥାନ୍ତେ ।
ଆଘାତରୁ ମୁକ୍ତି ପାଇବା ପାଇଁ ଦୀପକ ଚହର ଆଜିକାଲି ଦିନରାତି ପରିଶ୍ରମ କରୁଛନ୍ତି । ନିକଟରେ ଦୀପକଙ୍କର ଏକ ଭିଡିଓ ସାମ୍ନାକୁ ଆସିଛି, ଯେଉଁଥିରେ ସେ ଆଘାତରୁ ମୁକ୍ତି ପାଇବା ପାଇଁ କଠିନ ପରିଶ୍ରମ କରୁଛନ୍ତି । ଦ୍ରୁତ ବୋଲର ଏହି ଭିଡିଓକୁ ନିଜ ଇନଷ୍ଟାଗ୍ରାମରେ ସେୟାର କରିଛନ୍ତି । ସେ ଭିଡିଓ ସହିତ ଏକ କ୍ୟାପସନରେ ଲେଖିଛନ୍ତି, ‘ଦିଲ୍ ୟେ ଜିଦ୍ଦି ହୈ’ ଦୀପକ ଚହରଙ୍କ ଏହି ଭିଡିଓ ଏନସିଏରେ ଜିମ୍ କରିବା ସମୟରେ ଆସିଛି ।
