ବେଙ୍ଗାଲୁରୁ ୧୪।୦୩: ଭାରତ ଏବଂ ଶ୍ରୀଲଙ୍କା ମଧ୍ୟରେ ଖେଳାଯାଉଥିବା ଦିବାରାତ୍ର ଟେଷ୍ଟ ମ୍ୟାଚ୍ରେ ରେକର୍ଡ କରିଛନ୍ତି ଭାରତର ତାରକା ସ୍ପିନର ରବିଚନ୍ଦ୍ରନ ଅଶ୍ଵିନ। ସବୁଠୁ ଅଧିକ ଟେଷ୍ଟ ଓ୍ଵିକେଟ୍ ନେବା ମାମଲାରେ ସେ ଦକ୍ଷିଣ ଆଫ୍ରିକାର ତାରକା ଦ୍ରୁତ ବୋଲର ଡେଲ୍ ଷ୍ଟେନଙ୍କୁ ପଛରେ ପକାଇଛନ୍ତି। ଷ୍ଟେନ ଟେଷ୍ଟ କ୍ରିକେଟ୍ରେ ୪୩୯ ଓ୍ଵିକେଟ୍ ହାସଲ କରିଥିଲେ। ଏବେ ଅଶ୍ଵିନ ତାଙ୍କୁ ଅତିକ୍ରମ କରିଛନ୍ତି।
ଟେଷ୍ଟ କ୍ରିକେଟ୍ରେ ସବୁଠୁ ଅଧିକ ଓ୍ଵିକେଟ୍ ନେବା ମାମଲାରେ ଏବେ ସାତ ଜଣ ବୋଲର ଅଶ୍ଵିନଙ୍କଠୁ ଆଗରେ ରହିଛନ୍ତି। ସେଥିରୁ କେବଳ ଦୁଇ ଜଣ କ୍ରିକେଟ୍ର ବର୍ତ୍ତମାନ ଖେଳ ଜାରି ରଖିଛନ୍ତି। ସେ ଦୁଇ ବୋଲର ହେଉଛନ୍ତି ଇଂଲଣ୍ଡର ଜେମ୍ସ ଆଣ୍ଡରସନ ଏବଂ ଷ୍ଟୁଆର୍ଟ ବ୍ରଡ। ପିଙ୍କ ବଲ୍ ଟେଷ୍ଟର ତୃତୀୟ ଦିନରେ ଧନଞ୍ଜୟ ଡି ସିଲଭାଙ୍କୁ ଆଉଟ୍ କରି ଅଶ୍ଵିନ ୪୪୦ମ ଓ୍ଵିକେଟ୍ ହାସଲ କରିଛନ୍ତି।
ଷ୍ଟେନ ଦକ୍ଷିଣ ଆଫ୍ରିକା ପକ୍ଷରୁ ୯୩ଟି ଟେଷ୍ଟରେ ୪୩୯ ଓ୍ଵିକେଟ୍ ହାସଲ କରିଥିବା ବେଳେ ଅଶ୍ଵିନ ୮୬ତମ ଟେଷ୍ଟରେ ତାଙ୍କୁ ଅତିକ୍ରମ କରିଛନ୍ତି। ଅଶ୍ଵିନ ଏହି ସିରିଜରେ ୪୩୫ ଓ୍ଵିକେଟ୍ ନେଇ ଭାରତର ପୂର୍ବତନ ଅଧିନାୟକ କପିଲ ଦେବଙ୍କୁ ପଛରେ ପକାଇଥିଲେ। ଏହି ସିରିଜ୍ ପୂର୍ବରୁ ଅଶ୍ଵିନ ଟେଷ୍ଟରେ ୪୩୦ ଓ୍ଵିକେଟ୍ ହାସଲ କରିଥିଲେ।
