ନୂଆଦିଲ୍ଲୀ,୨୦/୩ : ଆସନ୍ତା ଅଗଷ୍ଟରେ ଆରମ୍ଭ ହେବ ଏସିଆ କପ । ଏଥିପାଇଁ ବିଧିବଦ୍ଧଭାବେ ସୂଚୀ ପ୍ରକାଶ ପାଇଛି । ଏସିସି ଦ୍ୱାରା ଜାରି ହୋଇଥିବା ବିବୃତିରେ କୁହାଯାଇଛି ଯେ ଏଥର ଟି-୨୦ ଫର୍ମାଟରେ ଏହି ଟୁର୍ଣ୍ଣାମେଣ୍ଟ ଖେଳାଯିବ । ଶ୍ରୀଲଙ୍କା ଏସିଆ କପ ଆୟୋଜନ କରିବାକୁ ଅଧିକାର ପାଇଛି । “ଏସିଆ କପ ୨୦୨୨ ଟି-୨୦ ଫର୍ମାଟରେ ଖେଳାଯିବ । ଅଗଷ୍ଟ ୨୭ରୁ ଆରମ୍ଭ ହୋଇ ଏହା ସେପ୍ଟେମ୍ବର ୧୧ ଯାଏ ଚାଲିବ । ଏହି ଟୁର୍ଣ୍ଣାମେଣ୍ଟ ପାଇଁ ଯୋଗ୍ୟତା ପର୍ଯ୍ୟାୟ ମ୍ୟାଚ୍ ଗୁଡିକ ଅଗଷ୍ଟ ୨୦ରୁ ଆରମ୍ଭ ହେବ ।” ଏସିଆ କପ ପ୍ରତି ୨ ବର୍ଷରେ ଥରେ ଆୟୋଜନ ହୋଇଥାଏ । ତେବେ ମହାମାରୀ କରୋନା ଯୋଗୁ ଏହାର ୨୦୨୦ ସଂସ୍କରଣ ଅନୁଷ୍ଠିତ ହୋଇପାରି ନଥିଲା । ହେଲେ ଏବେ ୨୦୨୨ରେ ଏସିଆ କପ ଖେଳାଯିବ । ୧୯୮୪ରେ ପ୍ରଥମଥର ପାଇଁ ଏସୀୟ ଦେଶଗୁଡିକୁ ନେଇ ଏସିଆ କପ ଆରମ୍ଭ ହୋଇଥିଲା ।
