ବୌଦ୍ଧ,୬/୪: – ଜିଲ୍ଲାସ୍ତରୀୟ ସ୍କାଉଟ ଗାଇଡ କ୍ୟାଂପରେ ବୌଦ୍ଧ ସେଣ୍ଟ୍ ଜାଭିୟର୍ସ ପବ୍ଲିକ ସ୍କୁଲର ଛାତ୍ରଛାତ୍ରୀମାନେ ଅଂଶଗ୍ରହଣ କରି ପୁରସ୍କୃତ ହୋଇଛନ୍ତି । ସେଣ୍ଟ୍ ଜାଭିୟର୍ସ ସ୍କୁଲର ସ୍କାଉଟ ଗାଇଡର ଶିକ୍ଷୟିତ୍ରୀ କ୍ୟାପଟେନ ଶ୍ରୀମତୀ ଚନ୍ଦ୍ରମା ଯୋଶୀଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଛାତ୍ରଛାତ୍ରୀମାନେ ବିଭିନ୍ନ ପ୍ରତିଯୋଗିତାରେ ଅଂଶଗ୍ରହଣ କରି ତିନୋଟି ପୁରସ୍କାର ହାସଲ କରିଥିଲେ । ସ୍କିଲୋରାମା ପ୍ରତିଯୋଗିତାରେ ଜାଭିୟର୍ସ ସ୍କୁଲ ଦ୍ୱିତୀୟ ସ୍ଥାନ, ଭିଲେଜ ଫେୟାର ଓ ଦଳଗତ ସଙ୍ଗୀତ ପ୍ରତିଯୋଗିତାରେ ତୃତୀୟ ସ୍ଥାନ ହାସଲ କରିଥିଲା । ବିଦ୍ୟାଳୟର ଛାତ୍ରୀ ପ୍ରିୟାଂଶୀ ପ୍ରତ୍ୟାଶା ନନ୍ଦ, ଛାତ୍ର ଆର୍ଯ୍ୟ ନାରାୟଣ ଦେବ ଓ ଅନମୋଲ ପାତ୍ର ପ୍ରମୁଖ ପିଆନୋ ପ୍ଲେ, ମନୋଏକ୍ସନ ଓ ପଶୁପକ୍ଷୀଙ୍କ ସ୍ୱର ପ୍ରଦର୍ଶନ କରି ଉପସ୍ଥିତ ଦର୍ଶକଙ୍କୁ ମନ୍ତ୍ରମୁଗ୍ଧ କରିଥିଲେ ।
ଛାତ୍ରଛାତ୍ରୀଙ୍କ ଏଭଳି କୃତୀତ୍ୱକୁ ନେଇ ପିଲାମାନଙ୍କୁ ଉତ୍ସାହିତ କରିବାପାଇଁ ସେଣ୍ଟ୍ ଜାଭିୟର୍ସ ପବ୍ଲିକ ସ୍କୁଲ ପରିସରରେ ଏକ ପୁରସ୍କାର ବିତରଣୀ ସମାରୋହ ଅନୁଷ୍ଠିତ ହୋଇଯାଇଛି । ଏହି ସମାରୋହରେ ସ୍କୁଲ ପ୍ରିନସିପାଲ ଶ୍ରୀମତୀ ସସ୍ମିତା ସେନାପତି ସ୍କାଉଟ ଗାଇଡରେ ଅଂଶଗ୍ରହଣ କରିଥିବା ସମସ୍ତ ଛାତ୍ରଛାତ୍ରୀଙ୍କ ସମେତ ପ୍ରଶିକ୍ଷିକା ଶ୍ରୀମତୀ ଯୋଶୀଙ୍କୁ ମାନପତ୍ର ଓ ଟ୍ରଫି ଦେଇ ସମ୍ବର୍ଦ୍ଧିତ କରିଥିଲେ । କାର୍ଯ୍ୟକ୍ରମ ପରିଚାଳନାରେ ବିଦ୍ୟାଳୟର ସମସ୍ତ ଶିକ୍ଷକ ଶିକ୍ଷୟିତ୍ରୀ ଓ କର୍ମଚାରୀ ସହଯୋଗ କରିଥିଲେ ।
