ବୌଦ୍ଧ:ଗତକାଲି ବିଳମ୍ବିତ ରାତ୍ରୀରେ ପୁରୁଣାକଟକ-ଧଳପୁର ରାସ୍ତାର ଖଣ୍ଡହତା ନାଳ ପୋଲ ନିକଟରେ ଏକ ବାଇକ ଦୁର୍ଘଟଣା ଘଟି ବାଇକ ଚାଳକ ଗୁରୁତର ଆହତ ହୋଇଛନ୍ତି । ମିଳିଥିବା ସୂଚନା ଅନୁସାରେ ଏକ ଘରୋଇ ଠିକାସଂସ୍ଥାର ହାଇୱା ଚଳାଉଥିବା ହରଭଙ୍ଗା ବ୍ଲକ ଲୁଣିବାହାଲ ଗ୍ରାମ ପଞ୍ଚାୟତ ମଧୁସୂଦନପୁର ଗ୍ରାମର ସୋମନାଥ ଦଳବେହେରା ଧଳପୁରରୁ ଓଡି୨୭ବି୬୯୮୨ନମ୍ବର ବିଶିଷ୍ଟ ଏକ ସୁପର ସ୍ପେ୍ଲଣ୍ଡର ବାଇକ ଯୋଗେ ନିଜ ଘରକୁ ଫେରୁଥିଲେ । ବାଇକଟି ଭାରସାମ୍ୟ ହରାଇ ଖଣ୍ଡହତା ନାଳ ପୋଲ ନିକଟରେ ଦୁର୍ଘଟଣାଗ୍ରସ୍ତ ହୋଇଥିଲା ।
ବିଳମ୍ବିତ ରାତ୍ରୀ ହୋଇଥିବାରୁ ଓ ରାସ୍ତା ଶୁନଶାନ ଥିବାରୁ ସେ ଅନେକ ସମୟ ଧରି ରକ୍ତାକ୍ତ ଅବସ୍ଥାରେ ପଡିରହିଥିଲେ । କଟକ ବଡ ଡାକ୍ତରଖାନାରେ ଏକ ଆମ୍ବୁଲାନ୍ସ ଚଲାଉଥିବା ଧଳପୁର ଗ୍ରାମର ଅନୀଲ ମହାଲିକ ସେହି ରାସ୍ତାରେ ଆମ୍ବୁଲାନସ ଧରି କଟକ ଫେରୁଥିବାବେଳେ ସୋମନାଥକୁ ଆଣି ପୁରୁଣାକଟକ ଡାକ୍ତରଖାନାରେ ଭର୍ତ୍ତି କରାଇଥିଲେ । ଅବସ୍ଥା ଗୁରୁତର ଥିବାରୁ ପ୍ରାଥମିକ ଚିକିତ୍ସା ପରେ ପ୍ରଥମେ ବୌଦ୍ଧ ଜିଲ୍ଲା ମୁଖ୍ୟ ଚିକିତ୍ସାଳୟକୁ ଓ ପରେ ସେଠାରୁ ବୁର୍ଲା ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା । ସୂଚନା ଅନୁଯାୟୀ ତାଙ୍କୁ ଆଜି କଟକ ବଡ ଡାକ୍ତରଖାନାକୁ ସ୍ଥାନାନ୍ତର କରାଯିବ ।
