ବୌଦ୍ଧ : ଏକ ବଲେରୋ ଗାଡିରେ ଗଞ୍ଜେଇ ଚୋରାଚାଲାଣ ହେଉଥିବା ଖବର ପାଇ କଣ୍ଟାମାଳ ପୁଲିସ ଜଗିଥିବା ବେଳେ ଗଞ୍ଜେଇ ଭର୍ତ୍ତି ବଲେରୋକୁ ଛାଡି ଚାଲାଣକାରୀ ଘଟଣାସ୍ଥଳରୁ ଫେରାର ମାରିଛନ୍ତି । ସୂଚନା ଅନୁସାରେ ଆଜି ଘଣ୍ଟାପଡା ଅଂଚଳରୁ ଜିଲ୍ଲା ବାହାରକୁ ଏକ ବଲେରୋରେ ଗଞ୍ଜେଇ ଚାଲାଣ ହେଉଥିବା ଖବର କୌଣସି ସୂତ୍ରରୁ କଣ୍ଟାମାଳ ପୁଲିସ ପାଇଥିଲା । ସେହିପରି ପୁଲିସ ଜଗିଥିବା ଖବର ମଧ୍ୟ ଚୋରା ଗଞ୍ଜେଇ ଚାଲାଣକାରୀ ପାଇ ଯାଇଥିଲେ । ମୁହାଁମୁହିଁ ହେବା ପୂର୍ବରୁ ଶ୍ରୀମାଲ ଗ୍ରାମ ନିକଟରେ ଓଆର୍ ୧୫ ଏଲ୍ ୮୨୦୭ ନମ୍ବର ବିଶିଷ୍ଟ ଗଞ୍ଜେଇ ଭର୍ତ୍ତି ବଲେରୋକୁ ଛାଡି ମାଫିଆ ଫେରାର ମାରିଲେ । ଗାଡିରେ ୧୧ଟି ବସ୍ତାରେ ଥିବା ୩ କ୍ୱିଣ୍ଟାଲ ୧୪ କେଜି ଗଞ୍ଜେଇ ସହ ବଲେରୋକୁ ଜବତ କରି ପୁଲିସ ଘଟଣାର ତଦନ୍ତ କରୁଥିବା ଜଣାପଡିଛି ।
