ଗଞ୍ଜାମ/ବ୍ରହ୍ମପୁର:ବ୍ରହ୍ମପୁର ବଡବଜାର ଥାନା ଅନ୍ତର୍ଗତ ଶ୍ରୀରାମ ନଗର ଅଞ୍ଚଳରେ ଏକ କୂଅ ଖୋଳାଯାଉଥିବା ସମୟରେ ମାଟି ଅତଡା ଖସି ଜଣେ ଯୁବକର ମୃତ୍ୟୁ ହୋଇଥିବା ବେଳେ ଅନ୍ୟ ଜଣେ ଆହତ ହୋଇଥିବା ସୂଚନା ମିଳିଛି । ମୃତ ଯୁବକ ଜଣକ ହେଲେ ଜଗଦଳପୁର ଗ୍ରାମର ସନ୍ତୋଷ ସେଠି । ତେବେ ସୂଚନା ପ୍ରକାରେ ଜାଣିବାକୁ ମିଳିଛି ଯେ, ସଦର ଥାନା ଅନ୍ତର୍ଗତ ଜଗଦଳପୁର ଗ୍ରାମର ଧୋବା ସାହିର ନଟିଆ ସେଠୀଙ୍କ ପୁଅ ସନ୍ତୋଷ ସେଠି(୩୩) ଏବଂ ଆଉ ତିନି ଜଣ ମିଶି ବ୍ରହ୍ମପୁର ବଡ ବଜାର ଥାନା ଅନ୍ତର୍ଗତ ଶ୍ରୀରାମନଗର ଅଞ୍ଚଳର ଜୈନିକ ବ୍ୟକ୍ତିଙ୍କ ଜାଗାରେ କୂଅ ଖୋଳୁଥିଲେ । ସନ୍ତୋଷ ଏବଂ ଅନ୍ୟ ଜଣେ ଯୁବକ କୂଅ ଭିତରେ ଥିବା ସମୟରେ ହଠାତ୍ ମାଟି ଅତଡା ଖସି ପଡ଼ିଥିଲା । ଫଳରେ ସନ୍ତୋଷ ଘଟଣା ସ୍ଥଳରେ ହିଁ ମୃତ୍ୟୁ ବରଣ କରିଥିବା ବେଳେ ଅନ୍ୟ ଜଣେ ବ୍ୟକ୍ତି ଆହତ ହୋଇଥିଲେ ।ଏହି ଘଟଣା ସମ୍ପର୍କରେ ସ୍ଥାନୀୟ ପୋଲିସ ସୂଚନା ପାଇବା ପରେ ଘଟଣା ସ୍ଥଳରେ ପହଞ୍ଚି ସନ୍ତୋଷର ମୃତଦେହକୁ କୂଅରୁ ଉଦ୍ଧାର କରି ଥାନାରେ ଏକ ଅପମୃତ୍ୟୁ ମାମଲା ରୁଜୁ କରି ବ୍ୟବଚ୍ଛେଦ ନିମନ୍ତେ ବ୍ରହ୍ମପୁର ଏମକେସିଜି ମେଡ଼ିକାଲ ପଠେଇଥିବା ବେଳେ ଆହତ ବ୍ୟକ୍ତିକୁ ଚିକିତ୍ସା ନିମନ୍ତେ ପଠାଇ ତଦନ୍ତ ଜାରି ରଖିଥିବା ନେଇ ଥାନା ପକ୍ଷରୁ ସୂଚନା ମିଳିଛି ।
