ମୁମ୍ବାଇ : ଚଳିତ ବର୍ଷ ପ୍ରାରମ୍ଭରୁ ବଲିଉଡ୍ର ଜଣକ ପରେ ଜଣେ ବ୍ୟକ୍ତିତ୍ୱ ବିଦାୟ ନେବାରେ ଲାଗିଛନ୍ତି । ପୂର୍ବରୁ ଇର୍ଫାନ୍ ଖାଁ ଓ ଋିଷି କାପୁରଙ୍କ ଭଳି ନାମିଦାମୀ ଅଭିନେତାଙ୍କର ପରଲୋକ ହୋଇସାରିଛି । ଏବେ ଆଉଜଣେ ଜଣାଶୁଣା ଅଭିନେତା ବଲିଉଡ୍ରୁ ବିଦାୟ ନେଇଛନ୍ତି । ସେ ହେଉଛନ୍ତି ସୁଶାନ୍ତ ସିଂ ରାଜପୁତ । ସୁଶାନ୍ତ ତାଙ୍କର ମୁମ୍ବାଇସ୍ଥିତ ନିଜ ଘରେ ଆତ୍ମହତ୍ୟା କରିଛନ୍ତି । ମୃତ୍ୟୁର କାରଣ ସ୍ପଷ୍ଟ ହୋଇନାହିଁ । ପୁଲିସ୍ ଶବକୁ ଜବତ କରି ପୋଷ୍ଟ ମର୍ଟମ୍ ପାଇଁ ପଠାଇ ଦେଇଛି । ତଦନ୍ତ ସରିବା ପରେ ଏବଂ ରିପୋର୍ଟ ଆସିବା ପରେ କାରଣ ଜଣାପଡ଼ିବ ବୋଲି ପୁଲିସ୍ କହିଛି । ବେକରେ ଫାଶୀ ଲଗାଇ ସେ ଆତ୍ମହତ୍ୟା କରିଛନ୍ତି । ତାଙ୍କର ଘରୋଇ ସହାୟକ ଏ ସଂପର୍କରେ ପ୍ରଥମେ ପୁଲିସ୍କୁ ଖବର ଦେଇଥିଲେ । ଏହାପରେ ସ୍ଥାନୀୟ ପୁଲିସ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା । ଟେଲି ସିରିଏଲ୍ରୁ କ୍ୟାରିୟର ଆରମ୍ଭ କରି ପରବର୍ତ୍ତୀ ସମୟରେ ସୁଶାନ୍ତ ଫିଲ୍ମ ଅଭିନୟ ଜଗତରେ ପ୍ରବେଶ କରିଥିଲେ । ମୃତ୍ୟୁବେଳକୁ ତାଙ୍କୁ ୩୪ ବର୍ଷ ବୟସ ହୋଇଥିଲା । ପ୍ରକାଶଥାଉକି, ଗତ ଶୁକ୍ରବାର ମଧ୍ୟ ଆଉଜଣେ ବିଶିଷ୍ଟ ଅଭିନେତା ରତନ ଚୋପ୍ରାଙ୍କର ଦେହାନ୍ତ ହୋଇଥିଲା । ସେ ବହୁଦିନ ଧରି କ୍ୟାନସରରେ ପୀଡ଼ିତ ଥିଲେ । କିଛିଦିନ ତଳେ ସେ ତାଙ୍କ ଚିକିତ୍ସା ପାଇଁ ଅଭିନେତା ଧର୍ମେନ୍ଦ୍ର, ଅକ୍ଷୟକୁମାର ଓ ସୋନୁ ସୁର୍ଙ୍କୁ ଆର୍ଥିକ ସାହାଯ୍ୟ ମାଗିଥିଲେ । କିନ୍ତୁ ତାଙ୍କୁ କେହିହେଲେ ସାହାଯ୍ୟ ପ୍ରଦାନ କରିନଥିଲେ ।
