ବାଲିଗୁଡ଼ା: କଳିଙ୍ଗା ଘାଟିରେ ଡକାୟତି ଘଟଣାରେ ତିନିଜଣ ଡକାୟତଙ୍କୁ ଗିରଫ କଲା ଜି.ଉଦୟଗିରି ପୋଲିସ୍ । ସେମାନଙ୍କ ନିକଟରୁ ନଗଦ ୫୦୦୦ଟଙ୍କା ସହ ୫ଟି ମୋବାଇଲ୍, ଦୁଇଟି ମୋଟରସାଇକେଲ,ଖଣ୍ଡା,କାତି ଓ ଲାଠି ଜବତ କରିଛି ପୋଲିସ୍ । ଗିରଫ ସମସ୍ତ ଡକାୟତ ଜି.ଉଦୟଗିରି ଥାନା କଳିଙ୍ଗା ଗ୍ରାମ ଅଞ୍ଚଳର ହୋଇଥିବା ପୋଲିସ୍ ପକ୍ଷରୁ ସୂଚନା । ସୂଚନା ପ୍ରକାରେ ଲକ୍ ଡାଉନ୍ ଯୋଗୁଁ ଗାଡ଼ି ମୋଟର ଯାତାୟାତ ବନ୍ଦ ରହିଥିଲା । ଲୋକେ ନିଜ ସୁବିଧା ଅନୁଯାୟୀ କାର୍ କିମ୍ବା ମୋଟରସାଇକେଲ ଯୋଗେ ଯାତାୟାତ କରୁଥିଲେ ।
ସୁନ୍ ଶାନ୍ ରାସ୍ତାର ସୁଯୋଗ ନେଇ ଗତ କିଛିଦିନ ଧରି କଳିଙ୍ଗା ଘାଟିରେ ଯାତ୍ରୀଙ୍କୁ ମାରଣାସ୍ତ୍ର ଦେଖାଇ ଲୁଟ୍ ତରାଜ ଚଲାଇଥିଲେ ଏହି ଡକାୟତି ଗ୍ୟାଙ୍ଗ୍ । ଅଭିଯୋଗ ହେବାପରେ ଡକାୟତଙ୍କୁ ଧରିବାପାଇଁ ଯୋର୍ ଦାର୍ ଉଦ୍ୟମ ଚଳାଇଥିଲା ଜି.ଉଦୟଗିରି ପୋଲିସ୍ । ଶେଷରେ ଡକାୟତଙ୍କୁ ଧରିବାରେ ସଫଳ ହୋଇଛି ପୋଲିସ୍ । ଘଟଣାରେ ସଂପୃକ୍ତ ତିନିଜଣ ଡକାୟତଙ୍କୁ ଗିରଫ କରି କୋର୍ଟ ଚାଲାଣ କରିଛି ଜି.ଉଦୟଗିରି ପୋଲିସ୍ । ଏଥିସହିତ ଘଟଣାର ଅଧିକ ତଦନ୍ତ ଚଳାଇଥିବା ସୂଚନା ଦେଇଛନ୍ତି ଆଇଆଇସି ନରେଶ କୁମାର ସାହୁ ।
