ପାୱାର ଚ୍ୟାନେଲରେ ନିଖୋଜ ଯୁବତୀଙ୍କ ଶବ ଉଦ୍ଧାର
ସମ୍ବଲପୁର: ଗତ ବିଳମ୍ବିତ ସନ୍ଧ୍ୟାରେ ସ୍ଥାନୀୟ ପାୱାର ଚ୍ୟାନେଲରେ ଝାସ ଦେଇ ଆତ୍ମହତ୍ୟା କରିଥିବା ଯୁବତୀଙ୍କ ଶବ ଆଜି ସକାଳେ ଉଦ୍ଧାର କରାଯାଇଛି । ତାଙ୍କୁ ଚିହ୍ମୟୀ ପ୍ରିୟଦର୍ଶିନୀ ସାହୁ ରୂପେ ଚିହ୍ନଟ କରାଯାଇଛି । ସ୍ଥାନୀୟ ବୀର ସୁରେନ୍ଦ୍ର ସାଏ ବୈଷୟିକ ବିଶ୍ୱବିଦ୍ୟାଳୟର ସମାବର୍ତ୍ତନ ଉତ୍ସବ ଗତକାଲି ଅନୁଷ୍ଠିତ ହୋଇଥିଲା ଓ ଏଥିରେ ସେ ନିଜ ଡିଗ୍ରୀ ସହିତ ପ୍ଲେସମେଣ୍ଟ ନିର୍ଦ୍ଦେଶ ମଧ୍ୟ ପାଇଥିଲେ । ସନ୍ଧ୍ୟାରେ ନିଜ ବନ୍ଧୁ ପ୍ରୀତିମାନ ଦେ ସହିତ ବାଇକ ଯୋଗେ ସେ ବୁଲିବାକୁ ଉକ୍ତ ଘଟଣାସ୍ଥଳକୁ ଯାଇଥିଲେ । ଏହି ଅଘଟଣ ହଠାତ ହୋଇଗଲା ବୋଲି ପ୍ରୀତିମାନ ପୁଲିସ ସହିତ ଗଣମାଧ୍ୟମକୁ ଜଣାଇଛନ୍ତି । ଗତ ରାତିରେ ହିଁ ଚିହ୍ମୟୀକୁ ଖୋଜା ଆରମ୍ଭ ହୋଇଯାଇଥିଲା ଓ ରାତି ଅନ୍ଧାରରେ ଏହା ଆଗେଇ ପାରି ନଥିଲା । ଇତିମଧ୍ୟରେ ଶୁଣିବାକୁ ମିଳୁଛି ଯେ ଚିହ୍ମୟୀ ଓ ପ୍ରୀତିମାନଙ୍କ ମଧ୍ୟରେ ପ୍ରେମ ପ୍ରସଙ୍ଗ ରହିଥିଲା ଓ କୌଣସି ବିବାଦ ଯୋଗୁଁ ସେ ଆତ୍ମହତ୍ୟା କରିଥିଲେ । ବର୍ତ୍ତମାନ ଏହା ମଧ୍ୟ ଶୁଣିବାକୁ ମିଳୁଛି ଯେ ଯୁବତୀ ଜଣକ ଗର୍ଭବତୀ ଥିଲେ ଓ ସେଇଥି ପାଇଁ ସେ ଏହି ନିଷ୍ପତ୍ତି ନେଇଥିଲେ । ତାଜା ଖବର ଅନୁସାରେ ମୃତ ଚିହ୍ମୟୀଙ୍କ ମାଁ ଏହା ଆତ୍ମହତ୍ୟା ନୁହେଁ ବରଂ ହତ୍ୟା ବୋଲି ଅଭିଯୋଗ କରିଛନ୍ତି ଓ ସେହି ଅନୁସାରେ ତଦନ୍ତ କରାଯିବା ପାଇଁ ଦାବି କରିଛନ୍ତି ।
