ପୁରୀ:ପୁରୀରେ ପୁଣି ଅପରାଧୀଙ୍କ ଖୁଲମ୍ ଖୁଲା ଆତଙ୍କରାଜ । ବଡ ଦାଣ୍ଡରେ ଖଣ୍ଡାରେ ହାଣିଲେ ଦୁର୍ବୃତ୍ତ । ଆଜି ସକାଳୁ ବଡଦାଣ୍ଡର ମାର୍କେଟ ଛକରେ ଘଟିଛି ଏହି ଭୟଙ୍କର ଛାତି ଥରା ଘଟଣା । ଦୁର୍ବୃତ୍ତଙ୍କ ଖଣ୍ଡା ଛୋଟରେ ଆହତ ହୋଇଛନ୍ତି ୩ ଜଣ । ଆହତଙ୍କୁ ପୁରୀ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିବା ବେଳେ ଜଣଙ୍କୁ ଗୁରୁତର ଅବସ୍ଥାରେ କଟକ ବଡ ଡାକ୍ତରଖାନାକୁ ରେଫର କରାଯାଇଛି । ସୂଚନା ଅନୁଯାୟୀ ଗତକାଲି ରାତିରେ ଖଡ଼ିପଦା ମେଳଣରେ ଉଭୟ ଗୋଷ୍ଠୀ ଭିତରେ ବଚସା ଓ ଗଣ୍ଡଗୋଳ ହୋଇଥିଲା । ଯାହା ଫଳରେ ପ୍ରତିଶୋଧ ପରାୟଣ ହୋଇ ଆଜି ସକାଳ ୬ଟା୩୦ ସମୟରେ ଗୋଟିଏ ଗୋଷ୍ଠୀର ୧୭ରୁ ୧୮ ଜଣ ଯୁବକ ମିଶି ପୁରୀ ମାର୍କେଟ ଛକ ବାଟା ଶୋରୁମ ନିକଟରେ ଅନ୍ୟଗୋଷ୍ଠିର ୩ ଜଣଙ୍କୁ ଅତି ନିର୍ମମ ଭାବରେ ହାଣିଚନ୍ତି । ଗୁରୁତର ଅବସ୍ଥାରେ ତାଙ୍କୁ ପୁରୀ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ଆହତମାନଙ୍କ ମଧ୍ୟରୁ ଦଇତାପଡା ସାହିର ହୃଷିକେଶ ପଣ୍ଡା, ପଞ୍ଚଚୌରା ସାହିର ଖଗେଶ୍ୱର ସାହୁ ଓ ନୂଆପାଟଣା ଗଳିର ସମୀର ନାମକ ଯୁବକ ଆହତ ହେଇଛନ୍ତି । ତେବେ ମାର୍କେଟ ଛକ ଅଞ୍ଚଳଟି ଜନଗହଳିପୂର୍ଣ୍ଣ ଅଞ୍ଚଳ ଏବଂ ଶ୍ରୀମନ୍ଦିର ଠାରୁ ମାତ୍ର ୫୦୦ ମିଟର ମଧ୍ୟରେ ହୋଇଥିବା ବେଳେ ସେଠାରେ ପୋଲିସ ଟ୍ରାଫିକର ପ୍ରହରା ମଧ୍ୟ ରହିଥାଏ । ଏଭଳି ଅଞ୍ଚଳରେ ଖଣ୍ଡା ବୁଲିବା ଓ ଅପରାଧୀଙ୍କ ଆତଙ୍କରାଜ୍କୁ ନେଇ ସହରବାସୀଙ୍କ ମଧ୍ୟରେ ଭୟର ବାତାବରଣ ଖେଳି ଯାଇଛି । ପୁରୀରେ ପୋଲିସ୍ର ଉପସ୍ଥିତି ଅଛିକି ନାହିଁ ବୋଲି ପୁରୀ ବାସିନ୍ଦା ଏବେ ପ୍ରଶ୍ନ କଲେଣି । ଗତ ଦୁଇଦିନ ତଳେ ଦୁଇ ସେବାୟତ ଗୋଷ୍ଠୀ ଗଣ୍ଡଗୋଳ ହୋଇ ଥିବା ବେଳେ ଖଣ୍ଡାରେ ଆକ୍ରମଣ ହୋଇଥିଲା । ଏହି ଘଟଣା ୨ ଦିନ ବିତି ନ ଥିବା ବେଳେ ବଡ ଦାଣ୍ଡରେ ପୋଲିସ୍ କର୍ମଚାରୀଙ୍କ ଉପସ୍ଥିତିରେ ଖଣ୍ଡାରେ ଆକ୍ରମଣ ପୁରୀ ବାସିନ୍ଦାଙ୍କୁ ସ୍ତବ୍ଧ କରିଦେଇଛି । ପୁରୀକୁ ପ୍ରତିଦିନ ହଜାର ହଜାର ଭକ୍ତ ଆସୁଥିବା ବେଳେ ଜଗନ୍ନାଥ ଧାମରେ ଏଭଳି ରକ୍ତପାତ ହିଂସାକାଣ୍ଡ ଘଟଣା ଭକ୍ତ ଓ ପର୍ଯ୍ୟଟକଙ୍କୁ ଭୟଭୀତ କରିଛି । ପୋଲିସ୍ ଅପରାଧୀଙ୍କୁ ଦୃଢ଼ହସ୍ତରେ ଦମନ କରିବା ପାଇଁ ଦାବୀ ହୋଇଛି । ସେପଟେ ପୋଲିସ ତରଫରୁ ଛାନଭିନ ଆରମ୍ଭ ହୋଇଥିବା ବେଳେ ୨ ଯୁବକଙ୍କୁ ଅଟକ ରଖିଛି ପୋଲିସ । ଅନ୍ୟପଟରେ ଘଟଣାର ତଦନ୍ତ ପାଇଁ ୩ଟି ଟିମ ଗଠନ ହୋଇଛି ଓ ଅଭିଯୁକ୍ତଙ୍କୁ ଧରିବା ପାଇଁ ପୋଲିସ୍ ଚଢାଉ ଜୋରଦାର କରିଥିବା ଅତିରିକ୍ତ ଏସପି ମିହିର ପଣ୍ଡା ସୂଚନା ଦେଇଛନ୍ତି ।
