ବୌଦ୍ଧ,୩/୭ – ଜଣେ ସାପ ଧରାଳୀଙ୍କ ସାପ କାମୁଡାରେ ମୃତ୍ୟୁ ହୋଇଥିବା ଭଳି ଏକ ଘଟଣା ବୌଦ୍ଧ ଜିଲ୍ଲା ହରଭଙ୍ଗା ବ୍ଲକ୍ ବୀରନରସିଂହପୁର ଗ୍ରାମ ପଂଚାୟତର ଡୁମୁରିମୁଣ୍ଡା ଗ୍ରାମରେ ଘଟିଛି । ମିଳିଥିବା ସୂଚନା ଅନୁଯାୟୀ ବୀରନରସିଂହପୁର ଗ୍ରାମ ପଂଚାୟତ ସୁବଳୟା ଗ୍ରାମରେ ଗତ ରାତିରେ ଜଣେ ବ୍ୟକ୍ତିଙ୍କ ଘରେ ଗୋଖର ନାଗ ସାପ ବାହାରିଥିଲା । ଖବର ପାଇ ଡୁମୁରିମୁଣ୍ଡା ଗ୍ରାମର ନାଗବାଚା ସାଧନା କରି ସାପ ଧରୁଥିବା ପ୍ରଶାନ୍ତ ମେହେର (୩୦ ବର୍ଷ) ରାତିରେ ସୁବଳୟା ଗ୍ରାମରେ ପହଞ୍ଚି ସାପକୁ ଧରି ନିଜ ଘରକୁ ଆଣିଥିଲେ । ଭୋର ପ୍ରାୟ ଘ ୪. ୩୦ ମିନିଟ ସମୟରେ ସାପକୁ ଗୋଟିଏ ପ୍ଲାଷ୍ଟିକ ଡବାରେ ଭର୍ତ୍ତି କରି ନିକଟସ୍ଥ ଜଙ୍ଗଲରେ ଛାଡିବା ପାଇଁ ନେଉଥିବା ବେଳେ ତାଙ୍କୁ ସାପ ଚୋଟ ମାରିଥିଲା । ସାପ କାମୁଡା ଯୋଗୁଁ ତାଙ୍କର ଶରୀରରେ ବିଷକ୍ରିୟା ପ୍ରବାହିତ ହୋଇଥିଲା । ସେ ଅଚେତ ହୋଇଯିବା ପରେ ତାଙ୍କୁ ଡାକ୍ତରଖାନା ନେବା ପାଇଁ ପରିବାର ଲୋକ ୧୦୮ ଆମ୍ବୁଲାନସକୁ ଫୋନ୍ କରିଥିଲେ ମଧ୍ୟ ଆମ୍ବୁଲାନସ୍ ଟିକିଏ ଡେରିରେ ପହଞ୍ଚିଥିଲା । ସକାଳ ପ୍ରାୟ ୯ ଘଣ୍ଟା ସମୟରେ ଡାକ୍ତରଖାନାରେ ପହଞ୍ଚି ଚିକିତ୍ସା ଆରମ୍ଭ ହେବା ପୁର୍ବରୁ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏ ଘଟଣା ପ୍ରଚାରିତ ହେବାପରେ ବୀରନରସିଂହପୁର ଅଞ୍ଚ଼ଳରେ ଶୋକର ଛାୟା ଖେଳିଯାଇଛି । ତାଙ୍କର ପରିବାରକୁ ତୁରନ୍ତ ସରକାରୀ ସହାୟତା ଯୋଗାଇ ଦେବାକୁ ଜନସାଧାରଣ ଦାବୀ କରିଛନ୍ତି ।
