ବୌଦ୍ଧ,୫/୭ – ବୌଦ୍ଧ ଥାନା ହରଭଙ୍ଗା ବ୍ଲକ୍ ବନ୍ଧାପଥର ଗ୍ରାମରେ ଗୋଟିଏ ପାଗଳା ଗାଈ ଆକ୍ରମଣରେ ଜଣେ ବୃଦ୍ଧା ମୃତ୍ୟୁବରଣ କରିଥିବା ଜଣାପଡିଛି । ମିଳିଥିବା ସୂଚନା ଅନୁଯାୟୀ ବନ୍ଧାପଥର ଗ୍ରାମର ଗୋଟିଏ ଗାଈ କୁକୁର କାମୁଡାରେ ଆକ୍ରାନ୍ତ ହୋଇ ପାଗଳ ହୋଇ ଯାଇଛି । ତାର ଦେହରେ କୁକୁର ଭଳି ସବୁ ଲକ୍ଷଣ ପ୍ରକାଶ ପାଇ ଗତ କିଛି ଦିନ ହେଲା ଲୋକଙ୍କୁ ଗୋଡାଇ ଗୋଡାଇ ଆକ୍ରମଣ କରିବା ସହ କାମୁଡି ପକାଉଥିବା ଗ୍ରାମବାସୀ ଦେଖିଥିଲେ । ଗତକାଲି ସନ୍ଧ୍ୟାରେ ଗ୍ରାମର ଜଣେ ବୃଦ୍ଧା ମହିଳାଙ୍କୁ ଆକ୍ରମଣ କରି କାମୁଡି ଦେଇଥିବା ଯୋଗୁଁ ସେ ଗୁରୁତର ଆହତ ହୋଇଥିଲେ । ଆଜି ସକାଳୁ ବୃଦ୍ଧାଙ୍କ ମୃତ୍ୟୁ ହୋଇଥିବା ଜଣାପଡିଛି । ସେହିପରି ଗ୍ରାମର ଆଉ କିଛି ବ୍ୟକ୍ତି ମଧ୍ୟ ଗାଈ ଆକ୍ରମଣରେ ଆହତ ହୋଇଛନ୍ତି । ଗାଈକୁ କାବୁ କରିବା ପାଇଁ ଗ୍ରାମବାସୀ ଚେଷ୍ଟାକରି ବିଫଳ ହୋଇଥିବା ବେଳେ ଆଜି ସକାଳେ ଗାଈଟି ମଧ୍ୟ ମୃତ୍ୟୁ ବରଣ କରିଥିବା ସୂଚନା ମିଳିଛି ।
