ଚମ୍ପୁଆ,: ୨୦୨୪ ସାଧାରଣ ନିର୍ବାଚନକୁ ଶାନ୍ତିଶୃଙ୍ଖଳାର ସହ ପରିଚାଳନା ପାଇଁ ଚମ୍ପୁଆ ପୋଲିସ ପକ୍ଷରୁ ବ୍ୟାପକ ବନ୍ଦୋବସ୍ତ କରାଯିବା ସହିତ ଅସମାଜିକ ତତ୍ୱ ଏବଂ ଚୋରା ମଦ କାରବାର ଉପରେ ଅଙ୍କୁଶ ଲଗାଇବା ନିମିତ ବ୍ୟାପକ ଚଢାଉ କରାଯାଇଛି । ନିର୍ବାଚନ ସମୟରେ ଦେଶୀ ଓ ବିଦେଶୀ ମଦ ଚୋରାକାରବାର ବଢିବାର ସମ୍ଭାବନା ରହିଥିବା ବେଳେ ଏସଡିପିଓ ବିଜୟ କୁମାର ମଲ୍ଲିକଙ୍କ ନିର୍ଦ୍ଦେଶ କ୍ରମେ ଥାନା ଅଧିକାରୀଣୀ ଦେବକୀ ନାଏକଙ୍କ ପ୍ରତ୍ୟକ୍ଷ ତତ୍ୱାବଧାନରେ ଆଜି ନାରଦପୁର, ଟଡୁଆବାହାଳ ଓ ମଙ୍ଗଳ ପୁର ଅଂଚଳରେ ଭୋର ସମୟରେ ଚଢାଉ କରାଯାଇଥିଲା । ଏହି ଚଢାଉବେଳେ ଦେଶୀ ମହୁଲି ମଦ ପ୍ରସ୍ତୁତ କରୁଥିବା ଲୋକ ପୋଲିସ ଆସିବାର ଖବର ପାଇ ସ୍ଥାନ ଛାଡି ପଳାଇଥିଲେ । ପୋଲିସ ୭୨୦୦ କେଜି ପୋଚ ନଷ୍ଟ କରିବା ସହିତ ୨୦୦ ଲିଟର ମହୁଲି ମଦ ଜବତ କରିବାରେ ସଫଳ ହୋଇଥିଲେ । ଏହା ସହିତ ବେଆଇନ ଭାବେ ବିକ୍ରି କରୁଥିବା ମହୁଲି ମଦ ପାଇଁ ୪ଜଣକୁ ଗିରଫ କରାଯାଇଥିବା ଥାନା ଅଧିକାରୀଣୀ ସୂଚନା ଦେଇଛନ୍ତି । ଏହି ଚଢାଉରେ ସବଇନିସପେକ୍ଟର ବରଦାପ୍ରଶନ୍ନ ସାହୁ,ହିମାଂଶୁ କୁମାର ପ୍ରଧାନ, ଏଏସଆଇ ଶୁଶାନ୍ତ କୁମାର ମହାନ୍ତ, ରେବତୀ ବୁଡ ସମେତ ବହୁ ଅଧିକାରୀ ସାମିଳ ହୋଇଥିଲେ ।
