ବୌଦ୍ଧ,୧୨/୭ – କଣ୍ଟାମାଳ ବ୍ଲକ୍ ରୁଣ୍ଡିମହୁଲ ଗ୍ରାମ ପଂଚାୟତର ଟାଙ୍ଗିଆ ପାଲି ଗ୍ରାମରେ ବହୁଦିନ ହେଲା ଦୁଇଟି ବିଦ୍ୟୁତ୍ ଖମ୍ବ ଢଳି ପଡିଥିବା ଦେଖିବାକୁ ମିଳୁଛି । ଖମ୍ବ ଢଳି ପଡିଥିବାରୁ ଖମ୍ବ ଉପର ଦେଇ ଯାଇଥିବା ୧୧ କେ.ଭି. ବିଦ୍ୟୁତ୍ ତାଙ୍କର ତଳକୁ ଓହଳି ପଡିଛି । ଭୂମିଠାରୁ ସ୍ୱଳ୍ପ ଉଚ୍ଚ଼ରେ ତାର ଓହଳି ରହିଥିବା ଓ ୧୧ କେ. ଭି. ବିଦ୍ୟୁତ୍ ପ୍ରବାହିତ ହେଉଥିବା ହେତୁ ଚାଷୀମାନେ ନିଜ ଜମିରେ ହଳ କରିବାକୁ ଭୟ କରୁଛନ୍ତି । ଏ ସମସ୍ୟାର ସମାଧାନ କରିବାପାଇଁ ବିଦ୍ୟୁତ୍ ବିଭାଗ ମନମୁଣ୍ଡା ଏସଡିଓ ଏବଂ ସ୍ଥାନୀୟ ଅଂଚଳର ଦାୟିତ୍ୱରେ କନିଷ୍ଠଯନ୍ତ୍ରୀଙ୍କୁ ଚାଷୀ ଓ ଗ୍ରାମବାସୀ ଅଭିଯୋଗ କରୁଥିଲେ ମଧ୍ୟ କୌଣସି ପଦକ୍ଷେପ ନେଉନଥିବା ଗ୍ରାମବାସୀ ପ୍ରକାଶ କରନ୍ତି । ବର୍ତ୍ତମାନ ଚାଷ କାମ ଆରମ୍ଭ ହୋଇଯାଇଥିଲେ ମଧ୍ୟ ଜମି ଉପରେ ତାର ଓହଳି ରହିଥିବାରୁ ସଂପୃକ୍ତ ଚାଷୀମାନେ ଜମିରେ ହଳ କରିବାକୁ ଭୟ କରୁଛନ୍ତି । ଏ ସମସ୍ୟାର ସମାଧାନ ପାଇଁ ବିଦ୍ୟୁତ୍ ବିଭାଗ ଅଧିକାରୀମାନେ ତୁରନ୍ତ ପଦକ୍ଷେପ ନେବାକୁ ଜନସାଧାରଣ ଦାବୀ କରିଛନ୍ତି ।
