ଭୁବନେଶ୍ୱର: ପିସିସି ସଭାପତି ଏବେ ବଦଳିବେ ନାହିଁ ବୋଲି ବରିଷ୍ଠ କଂଗ୍ରେସ ନେତା ରଞ୍ଜୀବ ବିଶ୍ୱାଳ ଆଜି ସ୍ପଷ୍ଟ କରିଛନ୍ତି । ସେ କହିଛନ୍ତି ପିସିସି ସଭାପତି ବଦଳିବା ନେଇ ଯେଉଁ ଚର୍ଚ୍ଚା ଜାରି ରହିଛି ତାହା ରାଜ୍ୟ କଂଗ୍ରେସର ଗୋଟିଏ ଗୋଷ୍ଠୀ ଦ୍ୱାରା ସୃଷ୍ଟି କରାଯାଇଛି । ଏବଂ ଗଣମାଧ୍ୟମରେ ତାହା ଖବର ହୋଇଛି । ମାତ୍ର ତାଙ୍କ ପାଖରେ ଯାହା ଖବର ଅଛି ଏବେ ପିସିସି ବଦଳିବାର ସମ୍ଭାବନା ନାହିଁ । ସେହିପରି ସେ ମଧ୍ୟ ପିସିସି ସଭାପତି ଦୌଡରେ ନାହାନ୍ତି । ଉଲ୍ଲେଖଯୋଗ୍ୟ ଯେ, ନିକଟରେ ପିସିସି ସଭାପତି ବଦଳିବେ ବୋଲି କଂଗ୍ରେସର ବରିଷ୍ଠ ନେତା ତଥା ଜଟଣୀ ବିଧାୟକ ସୁରେଶ କୁମାର ରାଉତରାୟ କହିଥିଲେ । ସେ କହିଥିଲେ ପିସିସି ଦୌଡରେ ୧୩ଜଣରୁ ଅଧିକ କଂଗ୍ରେସ ନେତା ଅଛନ୍ତି ସେମାନଙ୍କ ମଧ୍ୟରେ ଶରତ ପଟ୍ଟନାୟକ, ଶରତ ରାଉତ, ପ୍ରସାଦ ହରିଚନ୍ଦନ, ଜୟଦେବ ଜେନା ପ୍ରମୁଖ ଦାବିଦାର ଅଛନ୍ତି । ଦଳର ସୁପ୍ରିମୋ ସୋନିଆ ଗାନ୍ଧୀ ଓ ରାହୁଲ ଗାନ୍ଧୀ ଦେଶବ୍ୟାପୀ କଂଗ୍ରେସର ସାଂଗଠନିକ ପରିବର୍ତ୍ତନ ନେଇ ବିଚାରବିମର୍ଷ କରୁଛନ୍ତି । ଯୁବଗୋଷ୍ଠୀଙ୍କୁ ଏଥିରେ ଅଧିକ ପ୍ରାଧାନ୍ୟ ଦିଆଯିବ ବୋଲି ଶ୍ରୀ ରାଉତରାୟ କହିଥିଲେ ।
