ନୂଆଦିଲ୍ଲୀ : ଭାରତର ପ୍ରତିରକ୍ଷା ଶକ୍ତି ଆଗକୁ ଆହୁରି ସୁଦୃଢ଼ ହେବାକୁ ଯାଉଛି । ସମ୍ଭାବ୍ୟ ପଡୋଶୀ ଆକ୍ରମଣର ମୁକାବିଲା ପାଇଁ ଭାରତ ତା’ର ପ୍ରତିରକ୍ଷା କ୍ଷେତ୍ରରେ ଗୋଟିଏ ପରେ ଗୋଟିଏ ଅସ୍ତ୍ର ସାମିଲ କରୁଛି । ଏବେ ଫ୍ରାନ୍ସରୁ ଭାରତ ଅଭିମୁଖେ ଯାତ୍ରା କରିଛି ରାଫେଲ୍ । ରାଫେଲ୍ ହେଉଛି ଫ୍ରାନ୍ସ ନିର୍ମିତ ଯୁଦ୍ଧ ବିମାନ । ଯାହା ଶତ୍ରୁପକ୍ଷକୁ ପ୍ରତିହତ କରିବାରେ ସକ୍ଷମ । ସାତଜଣ ଭାରତୀୟ ପାଇଲଟ ପାଞ୍ଚୋଟି ରାଫେଲ୍ ବିମାନ ଉଡ଼ାଇ ଭାରତକୁ ଆଣୁଛନ୍ତି । ଆସନ୍ତା ବୁଧବାର ସେଗୁଡ଼ିକ ଅମ୍ବାଲା ଏୟାରବେସ୍ରେ ଅବତରଣ କରିବ ।
ଅଲ ଡାଫ୍ରା ଏୟାରବେସର ଦାୟିତ୍ୱ ଫ୍ରାନ୍ସ ଏୟାରଫୋର୍ସ ଉପରେ ରହିଛି । ଏଠାରେ, ରାଫେଲ ବିମାନଗୁଡ଼ିକର ଯାଞ୍ଚ ଏବଂ ଇନ୍ଧନ ଭରିବା କାର୍ଯ୍ୟ କରାଯିବ । ଏହା ପରେ ପାଞ୍ଚଟି ରାଫେଲ ବିମାନ ଜୁଲାଇ ୨୯ ସକାଳେ ଭାରତରେ ପହଞ୍ଚିବ । ସରକାରୀ ସୂତ୍ରରୁ ପ୍ରକାଶ ଯେ, ଦେଶର ସୀମା ବିବାଦକୁ ଦୃଷ୍ଟିରେ ରଖି ପ୍ରକୃତ ନିୟନ୍ତ୍ରଣ ରେଖାରେ ନିଜର କାର୍ଯ୍ୟକ୍ଷମତାକୁ ବଢ଼ାଇବା ପାଇଁ ଭାରତୀୟ ବାୟୁସେନାର ପ୍ରୟାସର ଏକ ଅଂଶ ଭାବରେ ରାଫେଲ ଜେଟ୍ ଲଦାଖ ସେକ୍ଟରରେ ନିୟୋଜିତ ହେବାର ସମ୍ଭାବନା ରହିଛି । ଫ୍ରାନ୍ସରୁ ୩୬ଟି ରାଫେଲ ବିମାନ କିଣିବା ପାଇଁ ଭାରତ ଏକ ଚୁକ୍ତି କରିଛି, ସେଥିମଧ୍ୟରୁ ପ୍ରଥମ ପର୍ଯ୍ୟାୟରେ ୫ଟି ବିମାନ ବିତରଣ କରାଯାଉଛି ।
ସୂଚନା ମୁତାବକ, ପ୍ରାୟ ୫୮,୦୦୦ କୋଟି ଟଙ୍କା ବ୍ୟୟରେ ୩୬ ରାଫେଲ ଯୁଦ୍ଧ ବିମାନ କ୍ରୟ କରିବା ପାଇଁ ସେପ୍ଟେମ୍ବର ୨୦୧୬ରେ ଫ୍ରାନ୍ସ ସହିତ ଭାରତ ଏକ ଆନ୍ତଃ- ସରକାରୀ ଚୁକ୍ତି ସ୍ୱାକ୍ଷର କରିଥିଲା । ଏହି ବିମାନ ବିଭିନ୍ନ ପ୍ରକାରର ଅସ୍ତ୍ରଶସ୍ତ୍ର ବହନ କରିବାକୁ ସକ୍ଷମ ଅଟେ । ଏହି ଜେଟଗୁଡିକ ଭିଜୁଆଲ୍ ରେଞ୍ଜ୍ ଏୟାର-ଟୁ-ଏୟାର ମିସାଇଲ୍, ସ୍କାଲ୍ କ୍ରୁଜ୍ କ୍ଷେପଣାସ୍ତ୍ର ଏବଂ ହାମର ବାହାରେ ୟୁରୋପୀୟ କ୍ଷେପଣାସ୍ତ୍ର ନିର୍ମାତା ଏମବିଡିଏର ମେଟେଅର ସହିତ ସଜାଯିବ । ଭାରତୀୟ ଦୂତାବାସ କହିଛନ୍ତି, ନୂତନ ରାଫେଲ ଭାରତର ବାୟୁ ଯୁଦ୍ଧ କ୍ଷମତାକୁ ଅଧିକ ଶକ୍ତିଶାଳୀ କରିବ ।
