କାଲବର୍ଗି,୩/୬ : କର୍ଣ୍ଣାଟକର କମଲାପୁର ସହରରେ ଆଜି ଭୟଙ୍କର ସଡ଼କ ଦୁର୍ଘଟଣାରେ ଏକ ବସ ଜଳିଯାଇଛି । ଏକ ଟେମ୍ପୋ ସହ ଧକ୍କା ହେବା ପରେ ସେଥିଲେ ନିଆଁ ଲାଗିଯାଇଥିଲା । ଏଥିରେ ୭ ଜଣ ଯାତ୍ରୀ ପ୍ରାଣ ହରାଇଛନ୍ତି । ୨୦ରୁ ଅଧିକ ଲୋକ ଆହତ ହୋଇଛନ୍ତି । କର୍ଣ୍ଣାଟକାର କମଲାପୁରା ସହରରେ ଏହି ଦୁଃଖଦ ଘଟଣା ଘଟିଛି । ଦୁର୍ଘଟଣାରେ ଆହତ ହୋଇଥିବା ଲୋକମାନଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି । ସେମାନଙ୍କ ମଧ୍ୟରୁ ୫ ଜଣଙ୍କ ଅବସ୍ଥା ସଙ୍କଟାପନ୍ନ । ପୁଲିସ୍ କହିଛି ଯେ ୨୯ ଜଣ ଯାତ୍ରୀଙ୍କୁ ନେଇ ବସ୍ଟି ଗୋଆରୁ ହାଇଦ୍ରାବାଦ ଯାଉଥିଲା । କମଲାପୁରା ନିକଟରେ ସାମ୍ନା ପଟୁ ଆସୁଥିବା ଗୋଟିଏ ଟେମ୍ପୋ ସହ ବସ୍ର ମୁହାଁମୁହିଁ ଧକ୍କା ହୋଇଥିଲା । ଦୁର୍ଘଟଣା ଏତେ ଭୟଙ୍କର ଥିଲା ଯେ ବସ୍ରେ ହଠାତ୍ ନିଆଁ ଲାଗି ଯାଇଥିଲା । ଏଥିସହ ବସ୍ଟି ରାସ୍ତା କଡକୁ ମଧ୍ୟ ଓଲଟି ପଡିଥିଲା । ସୌଭାଗ୍ୟବଶତଃ ୨୨ ଜଣ ଯାତ୍ରୀ ବସ୍ରୁ ଡେଇଁ ନିଜ ଜୀବନ ରକ୍ଷା କରିବାରେ ସକ୍ଷମ ହୋଇଥିଲେ ମଧ୍ୟ ବାକି ୭ ଜଣ ଏହା ମଧ୍ୟରୁ ବାହାରି ପାରି ନଥିଲେ । ଫଳରେ ସେମାନେ ନିଆଁରେ ପୋଡି ହୋଇ ପ୍ରାଣ ହରାଇଛନ୍ତି । ବସ୍ଟି ମଧ୍ୟ ସଂପୂର୍ଣ୍ଣ ଜଳି ଯାଇଛି । ପୁଲିସ୍ ଓ ଉଦ୍ଧାରକାରୀ ଟିମ୍ ଘଟଣାସ୍ଥଳରେ ପହଞ୍ଚି ଥିଲା । ତେବେ ସେତେବେଳକୁ ୭ ଜଣଙ୍କ ଜୀବନ ଚାଲି ଯାଇଥିଲା ।
