ଦଶପଲ୍ଲା,୨୬/୪- ନୟାଗଡ଼ ଜିଲ୍ଲା ଓଡ଼ଗାଁ ବ୍ଲକ ଅନ୍ତର୍ଗତ ବାଣ୍ଠପୁର ଗ୍ରାମ ପଞ୍ଚାୟତ ଅନ୍ତର୍ଗତ ପୋଡାସାହି ଗ୍ରାମର ନୂଆସାହିରେ ନିଆଁଲାଗି ୨୧ ପରିବାରର ୩୦ବଖରା ଘର ଜଳିପୋଡି ପାଉଁଶ ହୋଇଯିବା ସହ ୩୦ଟି ଛେଳି ଜୀବନ୍ତ ଦଗ୍ଧ ହୋଇ ଯାଇଛନ୍ତି । ସମସ୍ତ ପରିବାରର ଘରର ଆସବାବପତ୍ର ସମେତ ମହଜୁଦ ରଖିଥିବା ଚାଉଳ ,ଡାଲି ,ଖାଦ୍ୟ ସାମଗ୍ରୀ ଜଳିପୋଡି ସଂପୂର୍ଣ୍ଣ ଭାବରେ ନଷ୍ଟ ହୋଇଯାଇଛି । କେଉଁ କାରଣରୁ ଗ୍ରାମରେ ନିଆଁ ଲାଗିଥିଲା, ତାହା ଜଣାପଡିନଥିଲେ ମଧ୍ୟ ଖବରପାଇ ଓଡ଼ଗାଁ ଅଗ୍ନିଶମ ବାହିନୀ ନିଆଁ ଲିଭାଇବା କାର୍ଯ୍ୟ ଜାରି ରଖିଛନ୍ତି । କ୍ଷୟକ୍ଷତିର ସଠିକ୍ ଆକଳନ ହୋଇନଥିଲେ ମଧ୍ୟ ଆନୁମାନିକ ୭ ଲକ୍ଷରୁ ଅଧିକ ଟଙ୍କାର କ୍ଷତି ହୋଇଛି ବୋଲି ସ୍ଥାନୀୟ ସରପଞ୍ଚ ଜଗଦୀଶ ପ୍ରଧାନ ସୂଚନା ଦେଇଛନ୍ତି । ଘଟଣାସ୍ଥଳରେ ଜିଲ୍ଲା ପରିଷଦ ସଭ୍ୟ ବିଭୁପ୍ରସାଦ ସାହୁ ଏବଂ ବାଣ୍ଠପୁର ସରପଞ୍ଚ ପହଁଚି କ୍ଷତିଗ୍ରସ୍ତ ପରିବାରଙ୍କୁ ଶୁଖିଲା ଖାଦ୍ୟ ,ମହମବତୀ ,ଚୁଡା ,ବିସ୍କୁଟ ,ଚିନି ଆଦି ବଣ୍ଟନ କରିଛନ୍ତି । ରାଜସ୍ୱ ନିରୀକ୍ଷକ ଘଟଣାସ୍ଥଳରେ ପହଞ୍ଚି କ୍ଷୟକ୍ଷତି ଆକଳନ କରୁଛନ୍ତି । କ୍ଷତିଗ୍ରସ୍ତ ପରିବାରଙ୍କୁ ସରକାରୀ ସହାୟତା ପ୍ରଦାନ ପାଇଁ ସାଧାରଣରେ ଦାବି ହେଉଅଛି ।
