ବୌଦ୍ଧ,୧୬/୫- ବୌଦ୍ଧବ୍ଲକ୍ ବଘିଆପଡା ଗ୍ରାମ ପଞ୍ଚାୟତ ବଘିଆପଡା ଗ୍ରାମ ରଥସାହି ନିକଟରେ ଆଜକୁ 3 ବର୍ଷ ତଳେ ପ୍ରତିଷ୍ଠା ହୋଇଥିବା ସୌରଶକ୍ତି ଚାଳିତ ପାନୀୟଜଳ ପ୍ରକଳ୍ପ ଲୋକଙ୍କ କାମରେ ଆସୁନଥିବା ଅଭିଯୋଗ କରିଛନ୍ତି ଗ୍ରାମବାସୀ l ପ୍ରକଳ୍ପ ପ୍ରତିଷ୍ଠା ଦିନ ଠାରୁ ଏହା ଅଚଳ ହୋଇ ପଡିଛି ବୋଲି ଅଭିଯୋଗ ହେଉଛି | ଲକ୍ଷାଧିକ ଟଙ୍କା ବ୍ୟୟରେ ଆଜକୁ 3 ବର୍ଷ ତଳେ ଏ ପ୍ରକଳ୍ପ ପ୍ରତିଷ୍ଠା ହୋଇଥିଲା | ଏ ପ୍ରକଳ୍ପ ପାଇଁ ନୁଆଁ ବୋରିଂ ଖୋଳl ନଯାଇ ନିକଟରେ ଥିବା ଗୋଟିଏ ନଳକୂପର ବୋରିଂରେ ମୋଟର ସଂଯୋଗ କରା ଯାଇଥିଲା l ଫଳରେ ଆଗରୁ ଥିବା ନଳକୂପ ମଧ୍ୟ ଲୋକଙ୍କ ବ୍ୟବହାର ପାଇଁ ବନ୍ଦ ହେଲା ଓ ନୂତନ ପ୍ରକଳ୍ପ ମଧ୍ୟ କାର୍ଯ୍ୟକାରୀ ହୋଇ ପାରିଲା ନାହିଁ | ପଡ଼ାରେ ଥିବା ଅନ୍ୟ ଗୋଟିଏ ନଳକୂପରୁ ଲୋକେ ଧାଡିରେ ଠିଆ ହୋଇ ଜଳସଂଗ୍ରହ କରିବାକୁ ବାଧ୍ୟ ହେଉଛନ୍ତି | ଏ ସମ୍ପର୍କରେ ବାରମ୍ବାର ଅଭିଯୋଗ କଲେ ମଧ୍ୟ ପଞ୍ଚାୟତ କର୍ତୃପକ୍ଷ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁନାହିଁ l ଏ ସମ୍ପର୍କରେ ଜିଲ୍ଲାପାଳ ତୁରନ୍ତ ପଦକ୍ଷେପ ଗ୍ରହଣ କରିବାକୁ ଜନ ସାଧାରଣରେ ଦାବି ହେଉଛି |
