ବୌଦ୍ଧ,୧୯/୫- କରୋନାର ଦ୍ୱିତୀୟ ଲହର୍ ବୌଦ୍ଧଜିଲ୍ଲାରେ ତାର କାୟାବିସ୍ତାର କରିଚାଲିଛି । ଜିଲ୍ଲାର ୬୯ ଗୋଟି ଗ୍ରାମ ପଞ୍ଚାୟତ ମଧ୍ୟରୁ ୬୮ ଗ୍ରାମ ପଞ୍ଚାୟତ କରୋନା କବଳିତ ହୋଇ ସାରିଥିବାବେଳେ କେବଳ ଗୋଟିଏ ମାତ୍ର ଗ୍ରାମ ପଞ୍ଚାୟତ ଟିକରପଡା ଏ ବ୍ୟାଧି କବଳରୁ ସୁରକ୍ଷିତ ରହିଛି । ପୂର୍ବ ବର୍ଷରେ ଏ ଗ୍ରାମ ପଞ୍ଚାୟତର କିଛି ବ୍ୟକ୍ତି କରୋନାରେ ସଂକ୍ରମିତ ହୋଇଥିଲେ ମାତ୍ର ଏ ବର୍ଷ ଆସିଥିବା ଦ୍ୱିତୀୟ ଲହରରେ ଜଣେ ମଧ୍ୟ ବ୍ୟକ୍ତି ଏଯାଏଁ କରୋନା ସଂକ୍ରମିତ ହୋଇନଥିବା ଜଣାପଡିଛି । ଜିଲ୍ଲାର ଦକ୍ଷିଣ ଦିଗରେ ଥିବା ଟିକରପଡା ଗ୍ରାମ ପଞ୍ଚାୟତ ବଣ ପାହାଡ ଘେରା ଛୋଟ ଛୋଟ ଅନେକ ଗ୍ରାମକୁ ନେଇ ଗଠିତ । ଏହା ଆଦିବାସୀ ହରିଜନ ବହୁଳ ଗ୍ରାମପଞ୍ଚାୟତ । ଯାହାବି ହେଉ ଆଜିଯାଏଁ କରୋନା ଠାରୁ ଦୂରରେ ଥିବା ଜିଲ୍ଲାର ଏକମାତ୍ର ଗ୍ରାମପଞ୍ଚାୟତ ହେବାର ବିରଳ ଦୃଷ୍ଟାନ୍ତ ସୃଷ୍ଟି କରିପାରିଛି ।
