ବୌଦ୍ଧ,୧୯/୫- ବୌଦ୍ଧଜିଲ୍ଲା କଣ୍ଟାମାଳ ବ୍ଲକ୍ ବରଗୋଛା ଗ୍ରାମପଞ୍ଚାୟତ ଖଜରୋଜ୍ ଗ୍ରାମର ଉପରସାହି ବାସିନ୍ଦା ପିଇବା ପାଣି ପାଇଁ ୧୫ ଦିନ ହେଲା ହନ୍ତସନ୍ତ ହେଉଥିବା ବେଳେ ଗ୍ରାମପଞ୍ଚାୟତ କର୍ତ୍ତୃପକ୍ଷଙ୍କ କୁମ୍ଭକର୍ଣ୍ଣ ନିଦ୍ରା ଭାଙ୍ଗୁନଥିବା ସାହିବାସୀ ଅଭିଯୋଗ କରିଛନ୍ତି । ମିଳିଥିବା ସୂଚନା ଅନୁଯାୟୀ ଖଜରୋଜ୍ ଗ୍ରାମ ଉପର ସାହିରେ ଥିବା ଉକ୍ତ ନଳକୂପ ଗୋଟିକ ପ୍ରାୟ ୧୫ ଦିନରୁ ଅଧିକ ଦିନ ହେବ ଅଚଳ ହୋଇ ପଡିରହିଛି । ନଳକୂପ ମରାମତି ପାଇଁ ସରପଞ୍ଚଙ୍କୁ ବାରମ୍ବାର କହିବା ପରେ ମଧ୍ୟ ଆଜି ହେବ କାଲି ହେବ କହି ଦିନ ଗଡାଇ ଚାଲିଥିବା ଅଭିଯୋଗ କରିଛନ୍ତି ଗ୍ରାମବାସୀ । ଗ୍ରୀଷ୍ମ ପ୍ରବାହ ଯୋଗୁଁ ବନ୍ଧ ପୋଖରୀରୁ ଓ କୁଅଗୁଡିକ ଶୁଖି ଯାଇଥିବା ହେତୁ ଲୋକେ ରୋଷେଇ ଓ ପିଇବା ପାଣି ପାଇଁ ଡହଳ ବିକଳ ହେଉଥିବା ହେତୁ ତୁରନ୍ତ ଉକ୍ତ ନଳକୂପ ମରାମତି କରିବା ପାଇଁ ଗ୍ରାମବାସୀ ଦାବି କରିଛନ୍ତି ।
