ବୌଦ୍ଧ,୨୨/୬- ବୌଦ୍ଧଥାନା ବଘିଆପଡା ଫାଣ୍ଡି ଅଞ୍ଚଳରେ ଏକ ଜଘନ୍ୟ ହତ୍ୟାକାଣ୍ଡ ଘଟିଯାଇଛି । ଆମ୍ବଝରି ପଞ୍ଚାୟତର ବଏଲବେଡା ଗ୍ରାମର ଦେହେରୀ (ବଳି ଦେଉଥିବା ପୂଜକ) ବୁଡୁ ଝାଙ୍କର ସେହି ଗ୍ରାମର ବୀର ମନହୀରାଙ୍କୁ ହତ୍ୟାକରିଥିବା ପୋଲିସ ସୂତ୍ରରୁ ସୂଚନା ମିଳିଛି । ଆଜି ଅପରାହ୍ନରେ ଗ୍ରାମରେ ପୂଜାପରେ ବଳି ଦିଆଯାଇଥିଲା । ଏହାପରେ ଗାଁ ମଧ୍ୟରେ ପୂର୍ବଶତ୍ରୁତାକୁ କେନ୍ଦ୍ରକରି ହତ୍ୟାକାରୀ ଓ ମୃତକଙ୍କ ମଧ୍ୟରେ ଗଣ୍ଡଗୋଳ ଘଟିଥିଲା । ଏଥିରେ ଉତ୍ତ୍ୟକ୍ତ ହୋଇ ଦେହେରୀ ବଳି ଟାଙ୍ଗିରେ ବୀର ମନହୀରାକୁ ଚୋଟ ପକାଇଥିଲା । ଫଳରେ ଘଟଣାସ୍ଥଳରେ ହିଁ ବୀରଙ୍କର ମୃତ୍ୟୁ ହୋଇଯାଇଥିଲା । ଗ୍ରାମବାସୀଙ୍କ ଠାରୁ ଖବରପାଇ ପୋଲିସ ଘଟଣାସ୍ଥଳରେ ପହଞ୍ଚି ଟାଙ୍ଗି ଓ ମୃତଦେହ ଜବତକରିବା ସହିତ ଅଭିଯୁକ୍ତ ହତ୍ୟାକାରୀ ଥାନାକୁ ଆଣି ଅଧିକ ତଦନ୍ତ ଜାରି ରଖିଛି ।
