ରାୟଗଡା : ରାୟଗଡା ଜିଲ୍ଲା ମୁନିଗୁଡା ପୋଲିସକୁ ମିଳିଛି ଏକ ବଡ ସଫଳତା । ମାଳି ଢେପାଗୁଡା ନିକଟରେ ଟ୍ରକରେ ରାଜସ୍ଥାନ ଆଜମିରକୁ ଗଂଜେଇ ଚୋରା ଚାଲାଣ ପାଇଁ ପ୍ରସ୍ତୁତ ହେଉଥିବା ବେଳେ ଚଢ଼ାଉ କରି ପୋଲିସ ପାଇଛି ଏହି ସଫଳତା । ଏହି ଘଟଣାରେ ୬ଜଣ ଚାଲାଣ କାରୀକୁ ଗିରଫ କରିବା ସହ ବ୍ୟବହୃତ ଟ୍ରକ, ଟ୍ରାକ୍ଟର, ଅଟୋ ସହ ୭.୮ କୁଇଣ୍ଟାଲ ଗଂଜେଇକୁ ଜବତ କରିବାରେ ସଫଳ ହୋଇଛି । ତେବେ ଯବତ ହୋଇଥିବା ଗଞ୍ଜେଇର ଆନୁମାନିକ ମୂଲ୍ୟ ପ୍ରାୟ ୭୮ଲକ୍ଷ୍ୟରୁ ଉର୍ଦ୍ଧ୍ୱ ହେବ ବୋଲି ଜଣାପଡିଛି । ଗିରଫ ୬ ଜଣଙ୍କ ମଧ୍ୟରେ କୁଖ୍ୟାତ ଗଞ୍ଜେଇ ମାଫିଆ କରୁଣା ହିଆଲ, ତାଙ୍କ ଦୁଇ ପୁଅ ବିରେନ୍ଦ୍ର ହିଆଲ , ଜିତେନ୍ଦ୍ର ହିଆଲ ଓ ଅନ୍ୟ ସହଯୋଗୀ ବାବୁଲା ସେଠି, ଟ୍ରକର ମାଲିକ, ଡ୍ରାଇଭର ହୋଇଥିବା ବେଳେ ଏମାନଙ୍କୁ କୋର୍ଟ ଚାଲାଣ କରାଯାଇଛି । ଟ୍ରକଟି ବିଶାଖାପାଟଣାରୁ ଫେରୋ ନିକେଲ ନେଇ ରାଜସ୍ଥାନର ଆଜମିରକୁ ଯାଉଥିବା ବେଳେ ପୋଲିସ ବିଶ୍ୱସ୍ଥ ସୂତ୍ରରୁ ଖବର ପାଇ ଚଢ଼ାଉ କରି ଏହି ଗଞ୍ଜେଇକୁ ଜବତ ସହ ୬ଜଣଙ୍କୁ ଗିରଫ କରିଛି । ଏହି ଘଟଣାରେ ଅନ୍ୟ କାହାର ସମ୍ପୃକ୍ତି ଥିବା ନେଇ ତଦନ୍ତ ଜାରି ରହିଥିବା କହିଛନ୍ତି ବିଷମକଟକ ଏସଡିପିଓ ।
