ରାଜ୍ୟସ୍ତରୀୟ ସନ୍ତରଣ ପ୍ରତିଯୋଗୀତାରେ ପୁରସ୍କୃତ ହୋଇଥିବା ପ୍ରତିଯୋଗୀଙ୍କୁ ବୌଦ୍ଧଜିଲ୍ଲା ପ୍ରଶାସନ ତରଫରୁ ସମ୍ବର୍ଦ୍ଧିତ
ବୌଦ୍ଧ,୨୭/୯- ବୌଦ୍ଧ ଜିଲ୍ଲା ପ୍ରଶାସନ ତରଫରୁ ରାଜ୍ୟସ୍ତରୀୟ ସନ୍ତରଣ ପ୍ରତିଯୋଗୀତାରେ କୃତିତ୍ୱ ହାସଲ କରିଥିବା ପ୍ରତିଯୋଗୀଙ୍କୁ ଆଜି ଜିଲ୍ଲାପାଳ ଶ୍ରୀଯୁକ୍ତ ଲଲାଟେନ୍ଦୁ ମିଶ୍ର ସମ୍ବର୍ଦ୍ଧିତ କରିଛନ୍ତି । ସୂଚନାଯୋଗ୍ୟ ଯେ ରାଜ୍ୟସ୍ତରୀୟ ସନ୍ତରଣ ପ୍ରତିଯୋଗୀତା ପାଇଁ ବୌଦ୍ଧଜିଲ୍ଲା ଖଲିଆବଗିଚା ସାହିର ସୁନିତା ସାହୁ, ପୂଣ୍ୟତୋୟା ବେହେରା, ନନ୍ଦିନୀ ଦଳବେହେରା, ମନୋଜ ବେହେରା, ମନୋଜ କଅଁର, ହିତେଶ ମାହାଣା, ସୁବ୍ରତ ଦଳବେହେରା, ପୂର୍ଣ୍ଣିମା ନାୟକ, ( ଦିବ୍ୟାଙ୍ଗ )ରବିନାରାୟଣ ବେହେରା, ନୂଆସାହିର ପୃଥ୍ୱୀରାଜ ରାଉତ ଏବଂ ବାବୁସାହିର ରାଜା ବେହେରା, କୃତିତ୍ୱ ହାସଲ କରି ଗୋଲଡ଼, ବ୍ରୋଞ୍ଜ ଏବଂ ରୌପ୍ୟ ପଦକ ପାଇଥିଲେ । ବୌଦ୍ଧଜିଲ୍ଲା ପ୍ରଶାସନ ତରଫରୁ ପ୍ରତିଯୋଗୀମାନେ ସେପ୍ଟେମ୍ବର ମାସ ୨୪ ତାରିଖରେ ଭୁବନେଶ୍ୱରକୁ ପ୍ରତିଯୋଗୀତାରେ ଭାଗ ନେବାପାଇଁ ଯାଇଥିଲେ । ସେପ୍ଟେମ୍ବର ୨୫ ତାରିଖରେ ଜୁନିଅରସ୍ତରୀୟ ଏବଂ ୨୬ ତାରିଖରେ ସିନିଅର ସ୍ତରୀୟ ପ୍ରତିଯୋଗୀତାରେ ଭାଗ ନେଇ ସେମାନେ ବିଭିନ୍ନ ସ୍ଥାନ ଅଧିକାର କରି ସେଠାରେ ରାଜ୍ୟସ୍ତରକୁ ସମ୍ମାନିତ ହୋଇଛନ୍ତି । ଆଜି ବୌଦ୍ଧରେ ପହଞ୍ଚିବାପରେ ଜିଲ୍ଲାପାଳଙ୍କ ଆବାସିକ କାର୍ଯ୍ୟାଳୟ ପରିସରରେ ଜିଲାପାଳଙ୍କ ଦ୍ୱାରା ସମ୍ବର୍ଦ୍ଧିତ ହୋଇଥିଲେ । ସେମାନଙ୍କ ସହିତ କୋଚ ରବିନାରାୟଣ ବେହେରା, ଅମ୍ବ୍ରିତା ବନଛୋର, ନିମେଇଁ ବାଗ, ମହିଳା କୋଚ ଦ୍ରୌପଦୀ ରାଉତ ଏବଂ ଲିଡର ରବିନାରାୟଣ ରାଉତ ଉପସ୍ଥିତ ଥିଲେ । ଜିଲ୍ଲାସ୍ତରରେ ସମ୍ବର୍ଦ୍ଧିତ ହେବା ସମୟରେ ଜିଲ୍ଲା ସୂଚନା ଓ ଲୋକ ସମ୍ପର୍କ ଅଧିକାରୀ ରୀତାକାନ୍ତି ବଳିୟାର ସିଂ ଉପସ୍ଥିତ ରହି ପ୍ରତିଯୋଗୀମାନଙ୍କୁ ଉତ୍ସାହିତ କରିଥିଲେ ।
