ବୌଦ୍ଧ,୨୮/୯ – ଆଜି ମହାନଦୀରେ ଭାସି ଯାଉଥିବା ଜଣେ ବୃଦ୍ଧାଙ୍କୁ ଉଦ୍ଧାର କରାଯାଇଛି । ମିଳିଥିବା ଖବରରୁ ପ୍ରକାଶ ଯେ ଆଜି ଅପରାହ୍ନ ୪ଟା ସମୟରେ ବୌଦ୍ଧ ସହରର ନୂଆସାହି ଘାଟରେ ଜଣେ ବୃଦ୍ଧା ମହାନଦୀରେ ଭାସିଯାଉଥିବାବେଳେ କିିଛି ମାଛ ଧରାଳୀ ଓ ସ୍ଥାନୀୟ ଲୋକେ ତାଙ୍କୁ ଦେଖି ଉଦ୍ଧାର କରିଥିଲେ । ଉଦ୍ଧାର ହେବାପରେ ସ୍ଥାନୀୟ ଲୋକଙ୍କ ଠାରୁ ଖବରପାଇ ଘଟଣାସ୍ଥଳରେ ପୁଲିସ ପହଞ୍ଚିଥିଲା ଏବଂ ୧୦୮ ଆମ୍ବୁଲାନସ ଯୋଗେ ତାଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା । ସେ କିଛି କହିପାରୁନଥିବା ଯୋଗୁଁ ତାଙ୍କର ପରିଚୟ ମିଳିବାରେ ବିଳମ୍ବ ହୋଇଥିଲା । ଚିକିତ୍ସିତ ହେଉଥିବା ସମୟରେ କୌଣସି ସୂତ୍ରରୁ ଖବରପାଇ ତାଙ୍କର ପରିଜନମାନେ ଡାକ୍ତରଖାନାରେ ପହଞ୍ଚିଥିଲେ ଓ ତାଙ୍କର ପରିଚୟ ଦେଇଥିଲେ । ବୃଦ୍ଧାଜଣକ ହରଭଙ୍ଗା ବ୍ଲକ କରୁଣାପାଲି ଗ୍ରାମର ଝାର ବେହେରା (୮୦) ହୋଇଥିବାବେଳେ ଦୀର୍ଘ ୮ବର୍ଷ ହେଲା ବୌଦ୍ଧ ଖଦାଳସାହିର ଜଣେ ସଂପର୍କୀୟଙ୍କ ଘରେ ରହିଆସୁଥିଲେ । ଆଜି ଦିନ ପ୍ରାୟ ୧୦ଘଣ୍ଟା ସମୟରୁ ନିଖୋଜ ଥିଲେ । ତାଙ୍କ ସଂପର୍କୀୟମାନେ ଖୋଜାଖୋଜି କରିବାପରେ ମଧ୍ୟ ତାଙ୍କୁ ପାଇନଥିଲେ । ବର୍ତ୍ତମାନ ବୃଦ୍ଧାଜଣକ ସୁସ୍ଥ ଥିବା ଜଣାପଡିଛି ।
