ପୁରୀ : ଶ୍ରୀମନ୍ଦିର ପରିକ୍ରମା ମାର୍ଗର ଶୁଭ ଶିଳାନ୍ୟାସ ନିମନ୍ତେ ଆରମ୍ଭ ହୋଇଛି ପୂଜାର୍ଚ୍ଚନା ଓ ହୋମ ଯଜ୍ଞ । ଶ୍ରୀମନ୍ଦିର ଦୋଳ ବେଦୀ କୋଣ ଉତ୍ତର ପାର୍ଶ୍ୱ ମଠ ସାମ୍ନାରେ ଯଜ୍ଞ ମଣ୍ଡପରେ ଆରମ୍ଭ ହୋଇଛି ହୋମ ଯଜ୍ଞ । ଶ୍ରୋତୀୟ ବ୍ରାହ୍ମଣଙ୍କ ଦ୍ୱାରା ଏହି ହୋମ ଯଜ୍ଞ କରାଯାଉଛି । ୩ ଦିନ ଧରି ଏହି ଯଜ୍ଞ ହେବ । ୨୪ ତାରିଖରେ ଯଜ୍ଞର ପୂର୍ଣ୍ଣାହୁତି ହେବ । ସେହି କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ଯୋଗ ଦେବେ । ଗଜପତି ମହାରାଜା ଶୁଭ ଶିଳାନ୍ୟାସ କରିବେ । ଗତକାଲି ଯଜ୍ଞ ନିମନ୍ତେ ଅଙ୍କୁରାରୋପଣ ନୀତି ଶେଷ ହୋଇଛି । ଆଜି ସକାଳୁ ପଞ୍ଚ କର୍ମ, ବ୍ରାହ୍ମଣ ବରଣ, ସୂର୍ଯ୍ୟ ପୂଜା ପରେ ହୋମ ଯଜ୍ଞ ପୂଜା ଚାଲିବ । ତେବେ ମହାପ୍ରଭୁଙ୍କ କୃପାରୁ ନିଶ୍ଚିତ ଭାବେ ଶ୍ରୀମନ୍ଦିର ପରିକ୍ରମା ମାର୍ଗ ପ୍ରକଳ୍ପ ଶୀଘ୍ର ଶେଷ ହେବ ବୋଲି ଆଶା ରଖିଛନ୍ତି ଶ୍ରୀମନ୍ଦିର ପରିଚାଳନା କମିଟି ସଦସ୍ୟ ।
