ଚଣ୍ଡିଖୋଲ :

ଯାଜପୁର ଜିଲ୍ଲା ବଡ଼ଚଣା ଥାନା ଅନ୍ତର୍ଗତ ବଡ଼ଚଣା ଗ୍ରାମରେ ଆଜି ଏକ ଅଭାବନୀୟ ଘଟଣା ଘଟିଛି । ମାଆକୁ ପିଟିପିଟି ମାରିଦେଲା ପୁଅ, ଜଣେ ପୁଅ ନିଜ ଜନ୍ମ କଲା ମାଆକୁ କିଛି ଟଙ୍କା ପାଇଁ ପିଟିପିଟି ମାରି ଦେଇଥିବା ଖବର ସାମ୍ନାକୁ ଆସିଛି । ସୂଚନା ମୁତାବକ ବଡ଼ଚଣା ଗ୍ରାମର ସ୍ୱର୍ଗତ ଅନନ୍ତ ସାମଲଙ୍କ ପତ୍ନୀ ସୁଷମା ସାମଲ ଘରେ ଥିବା ବେଳେ ତାଙ୍କର ବଡ ପୁଅ ରଞ୍ଜନ କୁମାର ସାମଲ ମଦ୍ୟପାନ କରି ଘରକୁ ଫେରିଥିଲେ । ସେ ବିଧବା ମାଆକୁ ଟଙ୍କା ମାଗିଥିଲା । ମାଆ ଟଙ୍କା ନ ଦେବାରୁ ଏକ ବାଉଁଶରେ ମାଆଙ୍କ ମୁଣ୍ଡକୁ ବାଡେଇ ଦେଇଥିଲା ।

ଏଥିରେ ମାଆ ସୁଷମା ଗୁରୁତର ଆହତ ହୋଇଥିଲେ । ଘଟଣା ସ୍ଥଳରେ ଥିବା ୨ ସାନ ଭାଇ ବଡଭାଇକୁ କାବୁ କରିବା ସହ ଘରେ ବାନ୍ଧି ଦେଇଥିଲେ । ଅନ୍ୟ ପକ୍ଷରେ ଗୁରୁତର ଅବସ୍ଥାରେ ମାଆକୁ ବଡ଼ଚଣା ପ୍ରାଥମିକ ସ୍ୱାସ୍ଥ୍ୟ ଗୋଷ୍ଠି କେନ୍ଦ୍ରକୁ ନେଇଯାଇଥିଲେ । ତେବେ ବଡ଼ଚଣା ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ରରେ ସୁଷମାଙ୍କୁ ଡାକ୍ତର ମୁତ ଘୋଷଣା କରିଥିଲେ । ଏ ନେଇ ଘଟଣା ସ୍ଥଳରେ ବଡ଼ଚଣା ପୋଲିସ ପହଞ୍ଚି ମୃତଦେହକୁ ଜବତ କରିବା ସହ ବ୍ୟବଚ୍ଛେଦ ପାଇଁ ପଠାଇଥିବା ବେଳେ ବଡ ପୁଅ ଅଭିଯୁକ୍ତ ରଞ୍ଜନ କୁମାର ସାମଲକୁ ଗିରଫ କରିଛି ।

ଏ ନେଇ ସୁଷମାଙ୍କ ପରିବାର ଲୋକେ ବଡ଼ଚଣା ଥାନାରେ ଲିଖିତ ଅଭିଯୋଗ କରିଥିବା ବେଳେ ପୂର୍ବରୁ ମଧ୍ୟ ଅଭିଯୁକ୍ତ ରଞ୍ଜନ ବାରମ୍ବାର ମଦ୍ୟପାନ କରି ଘରକୁ ଆସି ନିଜ ପରିବାର ଲୋକଙ୍କୁ ମାରଧାର କରୁଥିବା ପରିବାର ଲୋକେ ଅଭିଯୋଗ କରିଛନ୍ତି । ଉକ୍ତ ଘଟଣାର ଅଧିକ ତଥ୍ୟ ପାଇବା ପାଇଁ ତଦନ୍ତ ଆରମ୍ଭ କରିଛି ବଡ଼ଚଣା ପୋଲିସ ।