ମୋହାଲି : ଅତିଥି ଶ୍ରୀଲଙ୍କା ବିପକ୍ଷ ପ୍ରଥମ ମ୍ୟାଚରେ ଭାରତ ଏକ ଇନିଂସ ଏବଂ ୨୨୨ ରନରେ ଜିତିଛି । ଏଥି ସହିତ ସିରିଜରେ ୧-୦ରେ ଆଗୁଆ ରହିଛି । ଏହି ମ୍ୟାଚ୍ ଉଭୟ ଦଳ ପାଇଁ ସ୍ୱତନ୍ତ୍ର ଥିଲା । ପୂର୍ବତନ ଅଧିନାୟକ ବିରାଟ କୋହଲି ତାଙ୍କର ୧୦୦ତମ ଟେଷ୍ଟ ଖେଳିଥିବା ବେଳେ ଶ୍ରୀଲଙ୍କା ଦଳ ସେମାନଙ୍କର ୩୦୦ତମ ମ୍ୟାଚ୍ ଖେଳିଥିଲା । ୧୦୦ ତମ ଟେଷ୍ଟ ମ୍ୟାଚ୍ ଖେଳିବାରେ ବିରାଟ ଦ୍ୱାଦଶ ଭାରତୀୟ ଖେଳାଳି ହୋଇଥିଲେ । ତେବେ ଏହି ଐତିହାସିକ ମ୍ୟାଚରେ ସେ ମାତ୍ର ୪୫ ରନ୍ ସ୍କୋର କରି ପାରିଥିଲେ । ବିରାଟ ଯଦିଓ ବ୍ୟାଟିଂରେ କମାଲ କରିପାରିନଥିଲେ କିନ୍ତୁ ତାଙ୍କ କାର୍ଯ୍ୟ ପାଇଁ ପ୍ରଶଂସକଙ୍କ ହୃଦୟ ଜିତିଥିଲେ । ମ୍ୟାଚର ତୃତୀୟ ଦିନରେ ସେ ପଡ଼ିଆରେ ଏକ ପ୍ରକାର ଉତ୍ସବ ପାଳନ କରିଥିଲେ, ଯାହା ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।
ମୋହାଲି ଟେଷ୍ଟର ତୃତୀୟ ଦିନରେ ଯେତେବେଳେ ରବୀନ୍ଦ୍ର ଜାଡେଜା ଶ୍ରୀଲଙ୍କା ଇନିଂସର ୫୧ ଓଭରରେ ଶ୍ରୀଲଙ୍କାର ଲାସିଥ ଆମ୍ବୁଲଡେନିଆଙ୍କୁ ଆଉଟ କରିଥିଲେ, ସେତେବେଳେ କୋହିଲ ଚଳଚ୍ଚିତ୍ର ପୁଷ୍ପା ଷ୍ଟାଇଲେ ରବିନ୍ଦ୍ର ଜାଡେଜାଙ୍କୁ ଅଭିନନ୍ଦନ ଜଣାଇଥିଲେ । ବିରାଟଙ୍କ ଏହି ଭିଡିଓ ବର୍ତ୍ତମାନ ସୋସିଆଲ ମିଡିଆରେ ବହୁତ ଭାଇରାଲ ହେବାରେ ଲାଗିଛି । ବିରାଟଙ୍କ ପୂର୍ବରୁ ମଧ୍ୟ ଅନେକ ଖେଳାଳି ‘ପୁଷ୍ପା ଦି ରାଇଜ୍’ ଚଳଚ୍ଚିତ୍ରର ଷ୍ଟେପ୍ କରୁଥିବାର ନଜରି ଆସିଛନ୍ତି । ରବିନ୍ଦ୍ର ଜାଡେଜା ମଧ୍ୟ ସେମାନଙ୍କ ମଧ୍ୟରୁ ଜଣେ ।
