ନୂଆଦିଲ୍ଲୀ: ପରିସ୍ଥିତି ଏମିତି ହେଲା ଯେ ଜଣେ ଛାତ୍ରୀଙ୍କୁ କାର ଭିତରେ ବସି ବୋଡର଼୍ ପରୀକ୍ଷା ଦେବାକୁ ପଡ଼ିଲା । ଏଭଳି ଘଟଣା ଘଟିଛି ଉତ୍ତର ପ୍ରଦେଶରେ । ଏବେ ଏହାର ଭିଡିଓ ବେଶ୍ ଭାଇରାଲ ହୋଇଛି । ଜୌନପୁରର କେରାକତ କୋତବାଲି ଅଞ୍ଚଳରେ ସଡକ ଦୁର୍ଘଟଣାରେ ଆହତ ହୋଇଥିବା ଦଶମ ଶ୍ରେଣୀର ଛାତ୍ରୀ ଜିଲ୍ଲା ପ୍ରଶାସନର ଅନୁମତି ନେଇ କାରରେ ବସି ପରୀକ୍ଷା ଦେଇଥିଲେ । ଛାତ୍ରୀ ବୁଧବାର ପ୍ରବେଶ ପତ୍ର (ଏଡମିଟ୍ କାର୍ଡ) ଆଣିବାକୁ ବିଦ୍ୟାଳୟ ଯାଉଥିବା ସମୟରେ ସଡକ ଦୁର୍ଘଟଣାର ସମ୍ମୁଖୀନ ହୋଇଥିଲେ । ଶ୍ରୀକୃଷ୍ଣ ବିହାରୀ ଇଣ୍ଟର କଲେଜସ୍ଥିତ ପରୀକ୍ଷା କେନ୍ଦ୍ରରେ କାରରେ ପରୀକ୍ଷା ଦେଉଥିବା ଛାତ୍ରୀ କୀର୍ତ୍ତି ମୌର୍ଯ୍ୟଙ୍କ ଫଟୋ ସୋସିଆଲ ମିଡିଆରେ ଏବେ ଚର୍ଚ୍ଚାରେ ବିଷୟ ପାଲଟିଛି । ଦଶମ ଶ୍ରେଣୀର ଛାତ୍ରୀ କୀର୍ତ୍ତି ମୌର୍ଯ୍ୟ ଜମାଲପୁରରେ ରହନ୍ତି । ବୁଧବାର ସେ ନିଜ ପ୍ରବେଶ ପତ୍ର ଆଣିବା ପାଇଁ ସ୍କୁଟି ଚଳାଇ ନିଜ ବିଦ୍ୟାଳୟକୁ ଯାଉଥିଲେ । ଧର୍ମାପୁର ପାଖରେ ଏକ ଅଟୋ ସହିତ ଧକ୍କା ହେବା ପରେ ସେ ସ୍କୁଟି ସହ ସଡକରେ ପଡି ଯାଇଥିଲେ । ଦୁର୍ଘଟଣାରେ କୀର୍ତ୍ତିଙ୍କ ଗୋଡ ଓ ହାତରେ ଆଘାତ ଲାଗିଥିଲା । ଗୁରୁବାର ଦିନ ସେ ଜିଲ୍ଲା ଅଧିକାରୀଙ୍କ ଅନୁମତି ନେଇ ଶ୍ରୀକୃଷ୍ଣ ବିହାରୀ ଇଣ୍ଟର କଲେଜସ୍ଥିତ ପରୀକ୍ଷା କେନ୍ଦ୍ରକୁ କାରରେ ଯାଇ ପରୀକ୍ଷା ଦେଇଥିଲେ ।
