ପଲଶାଗୋରା: ବୌଦ୍ଧ ଜିଲ୍ଲା କଣ୍ଟାମାଳ ଥାନା ଧାନଖଣ୍ଡି ବରପଦର ରାସ୍ତାର କୁରରାମୁଣ୍ଡା ଭିତରକୁ ବାଇକ ଖସି ପଡି ବରପଦର ଗ୍ରାମର ଯୁବକ ସୁଜିତ ମଲ୍ଲିକ(୩୦)ଙ୍କ ମୃତ୍ୟୁ ଘଟିଛି । ସୂଚନା ଅନୁସାରେ ଶନିବାର ରାତ୍ର ୧୧ଘଣ୍ଟା ସମୟରେ ରୁଣ୍ଡିମହୁଲ ପଞ୍ଚାୟତ ବରପଦର ଗ୍ରାମ ସୁଜିତ ଓ କୃପା କୌଣସି କାମରେ ଯାଇ ରାତିରେ ନିଜ ଗ୍ରାମ ବରପଦରକୁ ଫେରୁଥିବା ବେଳେ ଭାରସାମ୍ୟ ହରାଇ ରାସ୍ତା ଉପରୁ ପୋଖରୀ ଭିତରକୁ ଖସି ଯିବାରୁ ସୁଜିତଙ୍କ ବେକରେ ବାଇକଟି ଚାପି ହୋଇଯିବାରୁ ଘଟଣା ସ୍ଥଳରେ ତାଙ୍କର ମୃତ୍ୟୁ ଘଟିଥିବା ବେଳେ ଅନ୍ୟ ଯୁବକ କୃପା ଅପର ପାଶ୍ୱର୍ରେ ପଡି ରହିଥିଲେ । ଘଟଣାଟି ରାତିରେ ଘଟିଥିବାରୁ ଉଭୟଙ୍କୁ କେହି ଦେଖି ପାରିନଥିବାରୁ କେହି ଉଦ୍ଧାର କରିନଥିବା ବେଳେ ରବିବାର ସକାଳୁ ଲୋକେ ଦେଖିବା ପରେ ଘଟଣା ସଂପର୍କରେ ଜଣାପଡିଥିଲା । ସକାଳ ୮ଘଣ୍ଟାରେ ପୁଲିସ ଘଟଣା ସ୍ଥଳରେ ପହଞ୍ଚି ଯୁବକଙ୍କ ଦେହରେ ପଡିଥିବା ବାଇକକୁ ଉଠାଇ ଶବକୁ ଜବତ କରି ୫୪/୨୨ରେ କଣ୍ଟାମାଳ ଥାନାରେ ମାମଲା ରୁଜୁ କରି ତଦନ୍ତ କରୁଥିବା ଜଣାପଡିଛି । ଅନ୍ୟ ପଟେ ଉକ୍ତ ଘଟଣାକୁ ଲୋକେ ଏକ ହତ୍ୟାକାଣ୍ଡ ବୋଲି ଚର୍ଚ୍ଚା କରୁଥିବା ବେଳେ ଶବ ବ୍ୟବଚ୍ଛେଦ ରିପୋର୍ଟ ଆସିଲା ପରେ ସବୁ ଜଣାପଡିବ ବୋଲି ପୁଲିସ ସୂତ୍ରରୁ ପ୍ରକାଶ କରାଯାଇଛି ।
