ସମ୍ବଲପୁର: ସ୍ଥାନୀୟ ରେଙ୍ଗାଲି ପୁଲିସ ଥାନାରେ ଆଜି ଆୟୋଜିତ ଏକ ରକ୍ତଦାନ ଶିବିରରେ ୧୫୦ ୟୁନିଟ ରକ୍ତ ସଂଗ୍ରହ କରାଯାଇଛି । ପୁଲିସ ସୂତ୍ରରୁ ଏହି ବିଷୟରେ ପ୍ରାପ୍ତ ସୂଚନାନୁସାରେ ବର୍ତ୍ତମାନ ଖରାଦିନ ହୋଇ ଥିବାରୁ ପ୍ରାୟତଃ ସବୁ ରକ୍ତଭଣ୍ଡାରରେ ନିଅଣ୍ଟିଆ ସ୍ଥିତି ରହୁଛି, ଏଣୁ ଏହାକୁ ଭରଣା କରିବା ପାଇଁ ପୁଲିସ ବିଭାଗ ଓ ୫-ଟି ମୋ ସରକାର କାର୍ଯ୍ୟକ୍ରମ ଅନୁଯାୟୀ ଏହି ଶିବିର ଆୟୋଜିତ ହୋଇଛି । ଏହା ବ୍ୟତୀତ ଆଶା କରାଯାଉଛି କି ଏଭଳି ସ୍ୱେଚ୍ଛାକୃତ ରକ୍ତଦାନ ଶିବିର ବଳରେ ଦଲାଲ ମାନଙ୍କ ପ୍ରାଦୁର୍ଭାବ ନିୟନ୍ତ୍ରଣାଧୀନ ରହିବ । ଏହି ରକ୍ତଦାନ ଶିବିର ଆୟୋଜନରେ ସମ୍ପୂର୍ଣ୍ଣ ସହଯୋଗ ପାଇଁ ସେଠାକାର ସ୍ୱେଚ୍ଛାସେବୀ ଅନୁଷ୍ଠାନ ପରିଚୟ ଓ ସମ୍ବଳ ସହିତ ଜୟ ମାଁ ଦୂର୍ଗା କମିଟି ଓ ରେଙ୍ଗାଲି ମେଡିକାଲ ସଂଘ ଆଦିଙ୍କୁ ଆୟୋଜକଙ୍କ ପକ୍ଷରୁ ଧନ୍ୟବାଦ ଦିଆଯାଇଛି । ସମ୍ବଲପୁର ସଦର ହସ୍ପିଟାଲ ସ୍ଥିତ ବ୍ଲଡ଼ ବ୍ୟାଙ୍କ ଏହି ରକ୍ତଦାନ ଶିବିରକୁ ସମସ୍ତ ବୈଷୟିକ ସାହାଯ୍ୟ ଯୋଗାଇ ଦେଇଥିବାରୁ ସେମାନଙ୍କୁ ମଧ୍ୟ ଧନ୍ୟବାଦ ଅର୍ପଣ କରାଯାଇଛି ।
