ନବରଙ୍ଗପୁର: ସ୍ଥାନୀୟ ଗାନ୍ଧିନଗର ସ୍ଥିତ ଆରେମ୍ସି ପ୍ରାଙ୍ଗଣରେ ନବରଙ୍ଗପୁର ଜିଲ୍ଲା ସ୍ପୋର୍ଟସ ଏକାଡେ଼ମୀ ସଂଘ ତରଫରୁ ଏକ କରାଟେ ବେଲ୍ଟ ଟେଷ୍ଟ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଉକ୍ତ କାର୍ଯ୍ୟକ୍ରମରେ ଅତିଥି ଭାବରେ ଜିଲ୍ଲା କ୍ରୀଡ଼ା ସଙ୍ଘର ସହ ସମ୍ପାଦକ ମନୋଜ କୁମାର ପଟ୍ଟନାୟକ ଯୋଗ ଦେଇ କରାଟେ କ୍ରୀଡ଼ା ଉଭୟ ମାନସିକ ଓ ଶାରୀରିକ ବିକାଶ ପାଇଁ ସହାୟ ହେବ ବୋଲି କହିଥିଲେ । ଅନ୍ୟତମ ଅତିଥି ଭାବରେ ମଞ୍ଚ ନାଟକ ନାଟ୍ୟକାର ଜଗନ୍ନାଥ ବେହେରା ଯୋଗ ଦେଇଥିଲେ । ଏହି ଅବସରରେ କୃତି ଛାତ୍ରଛାତ୍ରୀଙ୍କୁ ଅତିଥିମାନେ ମାନପତ୍ର ଦେଇ ସମ୍ମାନିତ କରିଥିଲେ । ସଙ୍ଘର ସମ୍ପାଦକ ସେଂସାଇ ହାରିଷ ଚନ୍ଦ୍ର ବେହେରାଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଅନୁଷ୍ଠିତ ବେଲ୍ଟ ଟେଷ୍ଟ ପ୍ରତିଯୋଗିତାରେ ଚାଳିଶରୁ ଉର୍ଦ୍ଧ୍ୱ ଖେଳାଳି ଅଂଶଗ୍ରହଣ କରିଥିବାବେଳେ ସେଂସାଇ ରସାନନ୍ଦ ସତନାମୀ, ସେଂସାଇ ନୀଳ ନାୟକ, ସିହାନ ଡମୁ ପୂଜାରୀ ପ୍ରମୁଖ ପରିଚାଳନାରେ ସହଯୋଗ କରିଥିଲେ । ଅନ୍ୟମାନଙ୍କ ମଧ୍ୟରେ ଶିକ୍ଷୟିତ୍ରୀ ରୀନା ରାଣୀ ସାହୁ ଏବଂ ଅଜିତ କୁମାର ଦାସ ମଞ୍ଚସିନ ଥିଲେ ।
