ଭୁବନେଶ୍ୱର : ଓଡିଶା ବିଧାନସଭାର ସଦସ୍ୟମାନଙ୍କ ଦ୍ୱାରା ରାଜ୍ୟସଭାକୁ ତିନିଜଣ ସଦସ୍ୟ ନିର୍ବାଚନ ପାଇଁ ଭାରତର ନିର୍ବାଚନ କମିଶନ ବିଧିବଦ୍ଧ ଭାବେ ଆଜି ବିଜ୍ଞପ୍ତି ପ୍ରକାଶ କରିଛନ୍ତି । ଉକ୍ତ ବିଜ୍ଞପ୍ତି ମଧ୍ୟ ଆମ ରାଜ୍ୟର ମୁଖ୍ୟ ନିର୍ବାଚନ ଅଧିକାରୀଙ୍କ ଦ୍ୱାରା ବିଧିବଦ୍ଧ ଭାବେ ଓଡିଶା ରାଜପତ୍ରରେ ପୁନଃ ପ୍ରକାଶ ପାଇଛି । ଉକ୍ତ ବିଜ୍ଞପ୍ତି ଅନୁଯାୟୀ ଆଜିଠାରୁ ଆସନ୍ତା ୩୧ ତାରିଖ ପର୍ଯ୍ୟନ୍ ସରକାରଙ୍କ ଦ୍ୱାରା ପ୍ରକାଶିତ ଛୁଟି ଦିବସ ବ୍ୟତୀତ ଅନ୍ୟ ସମସ୍ତ ସରକାରୀ କାର୍ଯ୍ୟ ଦିବସରେ ପୂର୍ବାହ୍ନ ୧୧ ଘଟିକା ଠାରୁ ୩ ଘଟିକା ପର୍ଯ୍ୟନ୍ତ ବିଧାନସଭା ସଚିବାଳୟର କନଫରେନ୍ସ ହଲରେ ମନୋନୟନ ପତ୍ର ଦାଖଲ କରିବା ପାଇଁ ସମୟ ଧାର୍ଯ୍ୟ କରାଯାଇଛି । ସେହିପରି ଜୁନ୍ ୧ ତାରିଖ ପୂର୍ବାହ୍ନ ୧୧.୩୦ମି.ରେ ଦାଖଲ କରାଯାଇଥିବା ମନୋନୟନ ପତ୍ର ଉପରୋକ୍ତ ସ୍ଥାନରେ ଯାଞ୍ଚ କରାଯିବ । ଜୁନ୍ ୩ ତାରିଖ ଅପରାହ୍ନ ୩ ଘଟିକା ମଧ୍ୟରେ ମନୋନୟନ ପତ୍ର ପ୍ରତ୍ୟାହାର କରାଯାଇପାରିବ । ଆବଶ୍ୟକ ହେଲେ ଜୁନ୍ ୧୦ତାରିଖ ଦିନ ପୂର୍ବାହ୍ନ ୯ଟାଠାରୁ ଅପରାହ୍ନ ୪ଟା ମଧ୍ୟରେ ବିଧାନସଭା ସଚିବାଳୟର ୫୪ ନଂ କମିଟି ପ୍ରକୋଷ୍ଠରେ ଭୋଟ ଗ୍ରହଣ କରାଯିବ । ଏ ସଂପର୍କୀତ ନୋଟିସ୍ ଓଡିଶା ବିଧାନସଭା ସଚିବାଳୟର ନୋଟିସ୍ ବୋର୍ଡରେ ପ୍ରକାଶିତ କରାଯାଇଛି ଏବଂ ସମସ୍ତ ଜିଲ୍ଲାପାଳ/ଉପ ଜିଲ୍ଲାପାଳ/ପଞ୍ଚାୟତ ସମିତି/ ଗ୍ରାମ ପଞ୍ଚାୟତ କାର୍ଯ୍ୟାଳୟ ନୋଟିସ୍ ବୋର୍ଡରେ ଏହା ପ୍ରକାଶ କରିବା ପାଇଁ ସମସ୍ତ ଜିଲ୍ଲାପାଳମାନଙ୍କୁ ଅନୁରୋଧ କରାଯାଇଛି ।
