ସୁବର୍ଣ୍ଣପୁର: ସୋନପୁର ସଦର ବ୍ଲକ ସ୍ଥିତ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ ପ୍ରତାପପୁରରେ ମୋ ସ୍କୁଲ ଅଭିଯାନ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ପ୍ରଧାନ ଶିକ୍ଷୟିତ୍ରୀ ସନ୍ତୋଷିନୀ ନନ୍ଦଙ୍କ ପୌରୋହିତ୍ୟରେ ଅନୁଷ୍ଠିତ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବରେ ସିନିୟର ଟି.ସି. ପ୍ରମୋଦ କୁମାର ଦାଶ ଏବଂ ସମ୍ମାନୀତ ଅତିଥି ଭାବରେ ଜୁନିୟର ଟି.ସି. ମାନିନୀ ମେହେର ଯୋଗ ଦେଇଥିଲେ । ଶ୍ରୀଯୁକ୍ତ ଦାଶ ସ୍କୁଲର ବିଭିନ୍ନ ଉନ୍ନୟନ କାର୍ଯ୍ୟ ପରିଦର୍ଶନ କରିବା ସହିତ ବିଦ୍ୟାଳୟ ଅନୁଦାନ ପାଣ୍ଠିରେ କିଣା ଯାଇଥିବା ଟିଭିକୁ ଉଦଘାଟନ କରିଥିଲେ । ଅତିଥିମାନେ ମୋ ସ୍କୁଲ ଅଭିଯାନ କାର୍ଯ୍ୟକ୍ରମର ଉଦ୍ଦେଶ୍ୟ ସଫଳତା ତଥା ଆଲୁମିନୀମାନଙ୍କର ସଂପୃକ୍ତି ବିଷୟରେ ମତ ରଖିଥିଲେ । ବିଦ୍ୟାଳୟର ପୂର୍ବତନ ସଭାପତି ଧନସିଂ କଠାର, ବିଦ୍ୟାଳୟର ସର୍ବ ପ୍ରଥମ ଛାତ୍ରୀ ପାର୍ଥବୀ କଠାର, ଗ୍ରାମର ୱାର୍ଡ ସଭ୍ୟ ବିଶ୍ୱନାଥ ନାଗ ପ୍ରମୁଖଙ୍କୁ ଫୁଲତୋଡା ଓ ଉପଢୌକନ ଦେଇ ସମ୍ମାନିତ କରାଯାଇଥିଲା । ଏହି କାର୍ଯ୍ୟକ୍ରମକୁ ବିଦ୍ୟାଳୟର ରେଡ୍ କ୍ରସ୍ ପରାମର୍ଶଦାତା ଶିକ୍ଷକ ଗୋପେଶ ପଣ୍ଡା ସଂଯୋଜନା କରିଥିବା ବେଳେ ବିଦ୍ୟାଳୟ ପରିଚଳନା କମିଟୀର ସଭାପତି ଲକ୍ଷ୍ମଣ ମେହେର ଧନ୍ୟବାଦ ଅର୍ପଣ କରିଥିଲେ । ଶିକ୍ଷକ ଜୟରାମ ପଣ୍ଡା, ଅକ୍ଷୟ କୁମାର ଜେନା ଏବଂ ଶିକ୍ଷୟିତ୍ରୀ ମହେନ୍ଦ୍ରୀ ପଣ୍ଡା ପ୍ରମୁଖ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ ।
