ଗଞ୍ଜାମ: ପୂର୍ବ ଶତ୍ରୁତାକୁ କେନ୍ଦ୍ରକରି ଗଞ୍ଜାମ ଜିଲ୍ଲା କବିସୂର୍ଯ୍ୟନଗର ମେରୁବନ୍ଧ ସାହିରେ ଯୁବକକୁ ଛୁରା ମାଡ଼ । ଛୁରା ମାଡ଼ରେ ଅନିରୁଦ୍ଧ ନାୟକ ନାମକ ଯୁବକ ଗୁରୁତର ହୋଇଥିବା ଜଣାପଡିଛି । ତାଙ୍କୁ ବ୍ରହ୍ମପୁର ବଡ ମେଡିକାଲରେ ଭର୍ତ୍ତି କରାଯାଇଛି । ସୂଚନା ଅନୁସାରେ ବିଳମ୍ବିତ ରାତିରେ ଅନିରୁଦ୍ଧ ଖାଇସାରି ବାହାରେ ବୁଲୁଥିବା ସମୟରେ ସେହି ସାହିର ସାଗର ମାଝୀ ନାମକ ଯୁବକ ଏକ ଅଟୋରେ ଲୁଚି ରହି ସୁଯୋଗ ଦେଖି ଅନିରୁଦ୍ଧ ଉପରକୁ ଅତର୍କିତ ଭାବେ ଛୁରୀରେ ଆକ୍ରମଣ କରିଥିଲା । ସେ ପ୍ରତିରୋଧ କରିବାରୁ ପୁନର୍ବାର ଛୁରୀରେ ଆକ୍ରମଣ କରିଥିଲା । ଫଳରେ ଅନିରୁଦ୍ଧଙ୍କ ପେଟରେ ଆଘାତ ଲାଗିଥିଲା । ତାଙ୍କୁ ଚିକିତ୍ସା ନିମନ୍ତେ ପ୍ରଥମେ କବିସୂର୍ଯ୍ୟନଗର ମେଡିକାଲରେ ଭର୍ତ୍ତି କରାଯାଇଥିବା ବେଳେ ପ୍ରାଥମିକ ଚିକିତ୍ସା ପରେ ସ୍ୱାସ୍ଥ୍ୟବସ୍ଥା ଗୁରୁତର ହେବାରୁ ତାଙ୍କୁ ଡାକ୍ତର ବ୍ରହ୍ମପୁରକୁ ପଠାଇଦେଇଥିବା ଜଣାଯାଇଛି । ଉଭୟଙ୍କ ମଧ୍ୟରେ ପୂର୍ବରୁ ଶତ୍ରୁତା ରହିଥିଲା । ତେଣୁ ଏହି ମରଣାନ୍ତକ ଆକ୍ରମଣ ପୂର୍ବ ଶତ୍ରୁତାକୁ ନେଇ ହୋଇଥିବା ଆଲୋଚନା ହେଉଛି ।
