କରଞ୍ଜିଆ : ହୁତୁହୁତୁ ହୋଇ ଜଳିଗଲା ୧୦ ଚକିଆ ଟ୍ରକ । ଗାଡିରେ ଥିବା ଲକ୍ଷାଧିକ ଟଙ୍କାର ସାମଗ୍ରୀ ମଧ୍ୟ ପୋଡି ପାଉଁଶ ହୋଇଯାଇଛି । କିନ୍ତୁ ଅଳ୍ପକେ ବର୍ତ୍ତିଗଲେ ଡ୍ରାଇଭର ଏବଂ ହେଲପର । ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛି ।
ଖବର ଅନୁଯାୟୀ, ବୁଧବାର ବିଳମ୍ବିତ ରାତିରେ ପଶ୍ଚିବଙ୍ଗରୁ କେନ୍ଦୁଝର ଅଭିମୁଖେ ୪୯ ନଂ ଜାତୀୟ ରାଜପଥରେ ଗାଡିଟି ଯାଉଥିଲା । ଠିକ୍ ଏହି ସମୟରେ ଗାଡ଼ିରୁ ଧୂଆଁ ଏବଂ ନିଆଁ ବାହାରୁ ଥିବାର ଡ୍ରାଇଭର ଦେଖିବାକୁ ପାଇଥିଲେ । ଏହାପରେ ଗାଡ଼ିରୁ ଡେଇଁ ପଡ଼ିଥିଲେ ଡ୍ରାଇଭର ଏବଂ ହେଲ୍ପର୍ । ତେବେ ଏହି ଅଗ୍ନିକାଣ୍ଡରେ ଗାଡିର ଅଧିକାଂଶ ଅଂଶ ପୋଡିଯିବା ସହ ଗାଡିରେ ଲୋଡ ହୋଇଥିବା ସାମଗ୍ରୀରେ ମଧ୍ୟ ନିଆଁ ଲାଗିଯାଇଥିଲା ।ସେପଟେ ସ୍ଥାନୀୟଲୋକେ ଗାଡିରେ ନିଆଁ ଲାଗିଥିବା ଦେଖି କରଞ୍ଜିଆ ଅଗ୍ନିଶମ ବିଭାଗକୁ ଖବର ଦେଇଥିଲେ । ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ ।
