ନୂଆଦିଲ୍ଲୀ:ଟିମ୍ ଇଣ୍ଡିଆର ଅଧିନାୟକ ତଥା ତାରକା ବ୍ୟାଟ୍ସମ୍ୟାନ୍ ରୋହିତ ଶର୍ମା ବ୍ୟାଟ୍ ସହ ପଡିଆରେ ଅନେକ ବଡ ବଡ ସ୍କୋଲ କରିଥିବା ବେଳେ ଏବେ ସେ ଫିଲ୍ମ ଦୁନିଆରେ ମଧ୍ୟ ଧମାଲ କରିବାକୁ ପ୍ରସ୍ତୁତ ହେଉଛନ୍ତି । ରୋହିତ ଶର୍ମା ନିଜେ ଏହି ସୂଚନା ଦେଇଛନ୍ତି । ପ୍ରକୃତରେ ରୋହିତ ଶର୍ମା ତାଙ୍କ ଇନଷ୍ଟାଗ୍ରାମ ଆକାଉଣ୍ଟରେ ତାଙ୍କ ଫିଲ୍ମର ପୋଷ୍ଟର ସେୟାର କରିଛନ୍ତି । ରୋହିତ ଶର୍ମାଙ୍କ ଏହି ଚଳଚ୍ଚିତ୍ରର ନାମ ହେଉଛି ‘ମେଗା ବ୍ଲକବଷ୍ଟର’ । ଏହି ସିନେମାରେ ସାଉଥ ସିନେମାର କିଛି ସୁପରଷ୍ଟାର ମଧ୍ୟ ନଜର ଆସିବେ । ଓସିଏମ୍ ଏହି ଚଳଚ୍ଚିତ୍ର ନିର୍ମାଣ କରିବେ । ରୋହିତ ଶର୍ମାଙ୍କ ଅଭିନୟ ଦେଖିବାକୁ ପ୍ରଶଂସକମାନେ ଉତ୍ସାହର ସହିତ ଅପେକ୍ଷା କରିଛନ୍ତି । ଏହି ଚଳଚ୍ଚିତ୍ରରେ ରୋହିତ ଏକ ଗୁରୁତ୍ୱପୂର୍ଣ୍ଣ ଭୂମିକାରେ ନଜର ଆସିବେ । ଏହି ଫିଲ୍ମର ଟ୍ରେଲର ୪ ସେପ୍ଟେମ୍ବରରେ ମୁକ୍ତିଲାଭ କରିବ ।
ଟିମ୍ ଇଣ୍ଡିଆର ଅଧିନାୟକ ରୋହିତ ଶର୍ମା ପ୍ରଥମ ଥର ପାଇଁ ତାଙ୍କ ଫିଲ୍ମର ପୋଷ୍ଟର ସେୟାର କରିଛନ୍ତି । ସେ ଏହାର କ୍ୟାପସନରେ ଲେଖିଛନ୍ତି ଯେ ନର୍ଭସ ଅନୁଭବ କରୁଛି, ଏହା ଏକ ପ୍ରକାର ଡେବ୍ୟୁ । ରୋହିତ ଶର୍ମା ପ୍ରଥମ ଥର ପାଇଁ ଫିଲ୍ମରେ ନଜର ଆସିବେ ।
ଏହି ଚଳଚ୍ଚିତ୍ରରେ ଦକ୍ଷିଣର ସୁପରଷ୍ଟାର ଅଭିନେତ୍ରୀ ରଶ୍ମିକା ମନ୍ଦନା ମଧ୍ୟ ନଜର ଆସିବେ । ରଶ୍ମିକା ମନ୍ଦନା ଦକ୍ଷିଣ ଭାରତୀୟ ଫିଲ୍ମ ଜଗତର ଏକ ବଡ ତାରକା । ସେ ଦକ୍ଷିଣର ସୁପରଷ୍ଟାର ଆଲୁ ଅର୍ଜୁନଙ୍କ ସହ ‘ପୁଷ୍ପା’ ଫିଲ୍ମରେ ଅଭିନୟ କରିଥିଲେ । ଏହି ଚଳଚ୍ଚିତ୍ରରେ ସେ ନିଜ ଅଭିନୟ ସହିତ ସମସ୍ତଙ୍କ ହୃଦୟ ଜିତିଥିଲେ । ନିକଟରେ ରଶ୍ମିକା ମନ୍ଦନା ତାଙ୍କ ଅଫିସିଆଲ୍ ଇନଷ୍ଟାଗ୍ରାମ ହ୍ୟାଣ୍ଡେଲରେ ଫିଲ୍ମ ‘ମେଗା ବ୍ଲକବଷ୍ଟର’ର ପୋଷ୍ଟର ମଧ୍ୟ ସେୟାର କରିଛନ୍ତି ।
ସେହିପରି ଏହି ଚଳଚ୍ଚିତ୍ରରେ ଟିମ୍ ଇଣ୍ଡିଆର ଅଧିନାୟକ ତଥା ତାରକା ଓପନର୍ ରୋହିତ ଶର୍ମାଙ୍କ ବ୍ୟତୀତ ଭାରତୀୟ ଦଳର ପୂର୍ବତନ ଅଧିନାୟକ ତଥା କ୍ରିକେଟ୍ ବୋର୍ଡ ଅଫ୍ ଇଣ୍ଡିଆ (ବିସିସିଆଇ) ସଭାପତି ସୌରଭ ଗାଙ୍ଗୁଲି ମଧ୍ୟ ଏକ ଗୁରୁତ୍ୱପୂର୍ଣ୍ଣ ଭୂମିକାରେ ଅଭିନୟ କରିଛନ୍ତି । ସୌରଭ ଗାଙ୍ଗୁଲି ତାଙ୍କ ସୋସିଆଲ ମିଡିଆ ଆକାଉଣ୍ଟରେ ଏହି ଫିଲ୍ମର ପୋଷ୍ଟର ସେୟାର କରିସାରିଛନ୍ତି । ଏହା ବ୍ୟତୀତ ଦକ୍ଷିଣ ସିନେମାର ସୁପରଷ୍ଟାର କାର୍ତ୍ତିକ ଶିବକୁମାର ଏବଂ ପ୍ରସିଦ୍ଧ ହାସ୍ୟ ଅଭିନେତା କପିଲ ଶର୍ମା ମଧ୍ୟ ଏହି ଫିଲ୍ମରେ ନଜର ଆସିବେ ।
