ଖପ୍ରାଖୋଲ,୧୧/୯: ଖପ୍ରାଖୋଲ ବ୍ଲକ ଓଡ଼ିଆପାଲି ପଞ୍ଚାୟତ ବୁଢ଼ୀବାହାଲ କଲ୍ୟାଣ ମଣ୍ଡପ ଠାରେ ବିଜୁ ଜନତା ଦଳର ବ୍ଲକସ୍ତରୀୟ ନୂଆଁଖାଇ ଭେଟଘାଟ ତଥା କର୍ମୀ ସମ୍ମିଳନୀ ଆଜି ଅନୁଷ୍ଠିତ ହୋଇଯାଇଛି । ଏହି କାର୍ଯ୍ୟକ୍ରମ ରେ ବିଜେଡି ବ୍ଲକ ସଭାପତି ତଥା ବିଧାୟକ ପ୍ରତିନିଧି ରମେଶ ପ୍ରଧାନ ଅଧ୍ୟକ୍ଷତା କରିଥିବା ବେଳେ ମୁଖ୍ୟ ଅତିଥିଭାବେ ବିଧାନସଭା ସରକାରୀ ଉପମୁଖ୍ୟ ସଚେତକ ତଥା ପାଟଣାଗଡ଼ ବିଧାୟକ ସରୋଜ ମେହେର ଯୋଗଦେଇଥିଲେ । ସମ୍ମାନିତ ଅତିଥିରୂପେ ଖପ୍ରାଖୋଲ ବ୍ଲକ ଅଧ୍ୟକ୍ଷା ନିରୁପମା ପଟେଲ, ଉପାଧ୍ୟକ୍ଷ ଶୁଖିରାମ ଷାଣ୍ଢ , ଜିଲ୍ଲା ପରିଷଦ ସଭ୍ୟା ପ୍ରମିଳା ପାଥର, ବ୍ଲକ ମହିଳା ସଭାନେତ୍ରୀ ରଞ୍ଜିତା ସୁନା , ଜୋନ ସଭାପତି ସତ୍ୟନାରାୟଣ ମେହେର , ସୀମାଞ୍ଚଳ ପୁରୋହିତ ପ୍ରମୁଖ ଯୋଗଦେଇ ନୂଆଁଖାଇର ଅଭିନନ୍ଦନ ଜଣେଇବା ସହ ଦଳକୁ ତୃଣମୂଳ ସ୍ତରରୁ ସଶକ୍ତ କରିବାକୁ ଆହ୍ୱାନ ଦେଇଥିଲେ । ରାଜ୍ୟ ସରକାରଙ୍କ ଲୋକାଭିମୁଖୀ ଯୋଜନା ଲୋକଙ୍କ ପାଖରେ ପହଞ୍ଚାଇବାକୁ କହିଥିଲେ । ଏହି ଅବସରରେ ନିର୍ବାଚିତ ନୂତନ ସରପଞ୍ଚ, ସମିତି ସଭ୍ୟା ସଭ୍ୟ, ପ୍ରାଥମିକ କୃଷି ସମବାୟ ସମିତି ସଭାପତି ଓ ନିର୍ଦ୍ଦେଶକ ମାନଙ୍କୁ ଉପଢୌକନ ଦେଇ ସମ୍ବର୍ଦ୍ଧିତ କରାଯାଇଥିଲା । କାର୍ଯ୍ୟକ୍ରମ ଶେଷରେ ଶତାଧିକ ଅନ୍ୟ ଦଳର କର୍ମୀ ବିଜୁ ଜନତା ଦଳରେ ଯୋଗଦେଇଥିବା ବେଳେ ଅତିଥିମାନେ ସ୍ୱାଗତ କରିଥିଲେ । ଅନ୍ୟମାନଙ୍କ ମଧ୍ୟରେ ମହିଳା ସଭାନେତ୍ରୀ ଭାରତୀ ମେହେର, ଚନ୍ଦ୍ରକାନ୍ତି ବେହେରା, ବ୍ଲକ ଯୁବ ସଭାପତି ବେଲାର ମେହେର, ବ୍ଲକ ଛାତ୍ର ସଭାପତି ନାରାୟଣ ମେହେର, ଜିଲ୍ଲା କମିଟି ସଦସ୍ୟ ଇନ୍ଦ୍ରମଣି ସାହୁ , ବରିଷ୍ଠ ସଦସ୍ୟ ଗୋବିନ୍ଦ ବାରିକ, ପୂର୍ବତନ ସରପଞ୍ଚ ସୋଭାପତି ପାଥର ପ୍ରମୁଖ ମଞ୍ଚାସୀନ ଥିଲେ । ଏହି କାର୍ଯ୍ୟକ୍ରମରେ ୨୦୦୦ ଲୋକ ଉପସ୍ଥିତ ଥିଲେ ଏବଂ ବି.ଜେ.ପି ଓ କଂଗ୍ରେସର ୫୦୦ କର୍ମୀ ବିଜୁ ଜନତା ଦଳରେ ଯୋଗ ଦେଇଥିଲେ । କାର୍ଯ୍ୟକ୍ରମକୁ ଜିଲ୍ଲା ସାଧାରଣ ସମ୍ପାଦକ ପବିତ୍ର ପଟେଲ ପରିଚାଳନା କରିଥିବାବେଳେ ଭିକାରୀ ବିଶ୍ୱାଳ ଧନ୍ୟବାଦ ଅର୍ପଣ କରିଥିଲେ । ବୈଠକରେ ବ୍ଲକର ସମସ୍ତ କର୍ମୀମାନେ ଯୋଗଦେଇଥିଲେ ।
